အာရက္ခတိုင်းမ်စ် (၁၁ မေ ၂၀၂၆)
တပ်ချုပ်သစ် ရဲဝင်းဦးဟာ စစ်ခေါင်းဆောင် မင်းအောင်လှိုင်ထက် ပိုမို ဆိုးဝါးတယ်လို့ ဝေဟင် လေကြောင်းကင်းထောက်တမန် က ပြောပါတယ်။
“ အကြမ်းဖက်စစ်တပ်က ထိပ်ပိုင်းခေါင်းဆောင် အပြောင်းအလဲ ပြုလုပ်ပြီးနောက် အသစ်တက်လာတဲ့ စစ်ဦးစီးချုပ် ရဲဝင်းဦးဟာ ဆရာထက် တပည့် လက်စောင်းထက်လို့ဆိုကာ နိုင်ငံ နေရာအနှံ့အပြားတွင် လေကြောင်းတိုက်ခိုက်မှုများကို ပိုမို တိုးမြှင့် လုပ်ဆောင်လာကြောင်း တွေ့ရှိရပါတယ်။ မိမိတို့ ဝေဟင်ရဲ့ စောင့်ကြည့် လေ့လာတွေ့ရှိချက်များအရ ယခင် စစ်ခေါင်းဆောင် မင်းအောင်လှိုင် လက်ထက်ကထက် ပိုမိုဆိုးဝါးတဲ့အချက်မှာ အခုနောက်ပိုင်း လေကြောင်းတိုက်ခိုက်မှုများ ပြုလုပ်ရာတွင် လေယာဉ် ၃ စီး၊ ၄ စီး စသဖြင့် အုပ်စုလိုက် လှည့်ပတ်ပျံသန်းပြီး တနေရာတည်းတွင် အကြိမ်ပေါင်းများစွာ စုပြုံတိုက်ခိုက်တဲ့ နည်းဗျူဟာကို အသုံးပြုလာကြောင်း တွေ့ရှိရပါတယ်” လို့ ဝေဟင် လေကြောင်းကင်းထောက်တမန် က ထုတ်ပြန်ခဲ့ပါတယ်။
ထိုကဲ့သို့ တိုက်ခိုက်နေမှုကြောင့် တော်လှန်ရဲဘော်၊ တော်လှန်ပြည်သူများအနေနဲ့ အကြမ်းဖက်စစ်တပ်ရဲ့ ပိုမိုဆိုးဝါးလာတဲ့ လေကြောင်းအန္တရာယ်ကို ပိုမို သတိပြုကြရန် လိုအပ်ပါတယ်လို့လည်း လေကြောင်းကင်းထောက်တမန် က ဆိုပါတယ်။
အလားတူ မိမိတို့ ဝေဟင် လေကြောင်းကင်းထောက်ကွန်ယက်ကလည်း မိဘပြည်သူများအတွက် လေကြောင်းအန္တရာယ် ကင်းရှင်းစေရေး အတတ်နိုင်ဆုံး ကြိုးစား ဆောင်ရွက်နေပါတယ်။ မိဘပြည်သူများ ကြိုတင်သတိပြု ရှောင်ရှားနိုင်ရန် လေကြောင်းသတိပေးစာတိုများ ပေးပို့ပေးနေပြီး စာတိုရယူလိုပါက မိမိတို့နေထိုင်ရာမြို့နယ်ကို တယ်လီဂရမ်ချန်နယ်ဖြဟ်တဲ့ @WaiHinAirScout_Bot ကို ပေးပို့ပြီး သတိပေးစာတိုများ ရယူနိုင်ပါတယ်လို့လည်း ဆိုပါတယ်။
ထို့ပြင် မိဘပြည်သူများကို မေတ္တာရပ်ခံ တိုက်တွန်းလိုတာ နိုင်ငံအဝှမ်းရှိ (အထူးသဖြင့် မြန်မာပြည်အောက်ပိုင်း) မိဘပြည်သူများအနေနဲ့ မိမိတို့ သိရှိရသမျှ လေကြောင်းသတင်းများကို @WaiHinAirScout_Bot ထံသို့ အချိန်နဲ့တပြေးညီ ပေးပို့ပေးကြပါရန် မေတ္တာရပ်ခံ တိုက်တွန်းအပ်ပြီး မိမိတို့ရဲ့ သတင်းပေးပို့မှုတစ်ခုကြောင့် အပြစ်မဲ့ ပြည်သူပေါင်းများစွာရဲ့ အသက် အိုးအိမ် စည်းစိမ်များကို ကယ်တင်နိုင်ပါတယ်လို့လည်း ဝေဟင် လေကြောင်းကင်းထောက်တမန် က ထုတ်ပြန်ခဲ့ပါတယ်။
