ကပစ ၁၆ အနီးက ကာကင်း ၄ ခုကို AA သိမ်းပိုက်

by Rakhita Timesမေ 11, 2026မေ 11, 202619 183

အာရက္ခတိုင်းမ်စ် (၁၁ မေ ၂၀၂၆)

ပဲခူးတိုင်း၊ ပန်းတောင်းမြို့နယ်ရှိ အမှတ် (၁၆) ကာကွယ်ရေးပစ္စည်းစက်ရုံအနီးက ကာကင်းစခန်း ၄ ခုကို အာရက္ခတပ်တော်က သိမ်းပိုက်လိုက်တယ်လို့ သိရပါတယ်။

“ ဒီရက်ပိုင်းထဲပဲ သိမ်းလိုက်တာ ကပစ ၁၆ နားက ပွိုင့် ၅၀၀ ဗျူဟာကုန်းက ကာကင်း ၄ ခုကိုလေ စစ်တပ် (စစ်ကော်မရှင်) ဖက်ကလည်း မိုးရွာနေတာတောင် လေယာဉ်နဲ့ လာကြဲပေမယ့် လက်လွှတ်လိုက်ရပြီ” လို့ မြေပြင်စစ်ရေးသတင်းရင်းမြစ်တဦးက အာရက္ခတိုင်းမ်စ်ကို ပြောပါတယ်။

မေလဆန်းကတည်းက အာရက္ခတပ်တော်နဲ့ ပူးပေါင်းမဟာမိတ်တပ်တွေဟာ ပဲခူးတိုင်း ပန်းတောင်းမြို့နယ် မသုန်ရွာနားက ပွိုင့် ၅၀၀ ဗျူဟာကုန်းနဲ့ ဗျူဟာကုန်းက ကာကင်းစခန်း ၄ ခုကို တိုက်ခိုက်နေတာလည်း ဖြစ်ပါတယ်။

“ စကစ ၁၀ လက်အောက်ခံတပ်က တပ်သားတွေ အများဆုံးပဲ။ အခုမှ သင်းတန်းဆင်းတာတွေလည်း ပါတယ်။ ထွက်ပြေးလို့ ဖမ်းမိတာတွေရော၊ အလင်းဝင်လာတာတွေရော ဆက်တိုက်ရှိနေတယ်” လို့ သူက အာရက္ခတိုင်းမ်စ်ကို ဆက်ပြောပါတယ်။

အဆိုပါ ကာကင်းစခန်းကို စစ်ကော်မရှင်ရဲ့ စကစ (၁၀) လက်အောက်ခံ ခမရ (၃၆၃၊ ၃၆၄၊ ၃၆၆၊ ၃၆၉ ) တပ်ရင်းများက စုပေါင်းပြီး ခုခံခဲ့တာလည်း ဖြစ်ပါတယ်။

လက်ရှိမှာ ကပစ ၁၆ ရှိတဲ့ မသုန်ရွာအနီးနဲ့ ပန်းကန်ကွဲ၊ ညောင်ကျိုးရွာ ပတ်ဝန်းကျင်တွေမှာလည်း တိုက်ပွဲတွေ ဖြစ်နေတယ်လို့ သိရပါတယ်။

အာရက္ခတပ်တော်ဟာ မကွေးနဲ့ ပဲခူးမှာရှိတဲ့ စစ်ကော်မရှင်ရဲ့ လက်နက်ထုတ် စက်ရုံတွေဖြစ်တဲ့ ကပစ တွေကိုလည်း ပူးပေါင်းမဟာမိတ်တွေနဲ့အတူ ထိုးစစ်ဆင် တိုက်ခိုက်နေတာလည်း ဖြစ်ပါတယ်။