အာရက္ခတိုင်းမ်စ် (၁၉ ဇွန် ၂၀၂၆)
၂၀၂၆ခုနှစ် ဇွန်လ ၁၉ ရက်မှာ ကျရောက်တဲ့ ဒေါ်အောင်ဆန်းစုကြည်ရဲ့ ၈၁ နှစ်ပြည့်မွေးနေ့အတွက် မွေးနေ့ဆုတောင်းကို ဒေါ်အောင်ဆန်းစုကြည်ရဲ့ သားဖြစ်သူ ကိုထိန်လင်းကတဆင့် အာရက္ခတပ်တော် ဒုစစ်ဦးစီးချုပ် ဒေါက်တာညိုထွန်းအောင်က ဆုတောင်းပေးခဲ့တယ်လို့ သိရပါတယ်။
“ ညီအစ်ကိုတို့ရေ အားတင်းထားကြပါ စည်းလုံးညီညွတ်စွာနဲ့ လိုရာခရီးပန်းတိုင်ကို နောက်မဆုတ်တဲ့စိတ် ဘယ်တော့မှ အရှုံးမပေးတဲ့ စိတ်ဓာတ်တွေနဲ့အတူ အောင်ပွဲဆီသို့ မရောက်ရောက်အောင် သွားကြရအောင်” လို့ လူကြီးမင်းရဲ့မိခင် မွေးနေ့မှာ အမှတ်တရစကား ပါးချင်ပါတယ် လို့ ဒေါက်တာညိုထွန်အောင်က ရေးသားထားပါတယ်။
အလားတူ ဒေါက်တာညိုထွန်းအောင်က “ ONE DAY WE WILL MEET” ဆိုတဲ့ လူကြီးမင်းရဲ့ စကားအတိုင်းပဲ ဒီတိုင်းပြည် ငြိမ်းချမ်းကြတဲ့နေ့ကြရင် ကျနော်တို့ အာရက္ခမြေရဲ့ အလှဆုံးနေရာတစ်ခုခုမှာ ဆုံတွေ့ကြတာပေါ့။ အေးချမ်းသွားတဲ့ တချိန်ကျရင် ကျနော်တို့ အာရက္ခမြေကို လာလည်ဖို့လည်း ဖိတ်ခေါ်ပါတယ်။ အခါအခွင့်ကြုံရင် ကျနော့်ရဲ့ မွေးနေ့ဆုတောင်းစကားကိုလည်း လူကြီးမင်းရဲ့ အမေ့ဆီ အမှာပါးလို့ရရင် ပါးပေးစေလိုပါတယ်လို့လည်း ရေးသားထားပါတယ်။
ဒါ့အပြင် ဒေါက်တာညိုထွန်းအောင်က “ အမေ့ကို ပိုချစ်ကြတဲ့ သားတွေထဲက တစ်ယောက်ဖြစ်တဲ့ KIM, လူကြီးမင်းလည်း ကျန်းမာပြီး ပျော်ရွှင်ပါစေ အစစအရာရာ အဆင်ပြေပါစေ သားအမိနှစ်ယောက်လည်း အမြန်ဆုံး ပြန်ဆုံတွေ့ကြပါစေလို့ လူသားဆန်ဆန် အရိုးခံစိတ်နဲ့ ဆုမွန်ကောင်း တောင်းပေးလိုက်ပါတယ်။ ကျနော့်ကို မိတ်ဆွေစစ်တစ်ယောက်အဖြစ် အမြဲတမ်း မှတ်ယူထားလို့ ရပါတယ်” လို့လည်း ဆိုပါတယ်။
ဒေါ်အောင်ဆန်းစုကြည်ရဲ့ သားဖြစ်သူ ကိုထိန်လင်းက ဒေါက်တာညိုထွန်းအောင်ကို Alan Clements ရေးသားထားတဲ့ “ Conversation with a Dictator” စာအုပ် ရှေ့ဖုံးတွင် အမှတ်တရ လက်မှတ်ရေးထိုးပြီး လက်ဆောင်ပေးခဲ့တဲ့အပေါ် ဒေါက်တာညိုထွန်းအောင်က ပြန်လည် ကျေးဇူးတင်စကားပြောကြားရာမှာ အခုလို ထည့်သွင်းရေးသားထားတာလည်း ဖြစ်ပါတယ်။
