အာရက္ခတိုင်းမ်စ် (၂၈ ဇွန် ၂၀၂၆)
ရွေးတုအစိုးရဟာ ရက္ခိုင်ပြည် စစ်တွေနဲ့ ကျောက်ဖြူ၊ ရက္ခိုင် – မကွေး – ပဲခူး – ချင်း နယ်စပ်တွေမှာ စစ်မှုထမ်းအသစ်တွေကို လူသားလှိုင်းအဖြစ် အသုံးပြုကာ ထိုးစစ်ဆင်နေတယ်လို့ အာရက္ခတပ်တော်က ဆိုပါတယ်။
“ စစ်တွေ၊ ကျောက်ဖြူမြို့ ပတ်ဝန်းကျင်၊ ရက္ခိုင်-မကွေးအစပ်၊ ရက္ခိုင်-ပဲခူးအစပ်၊ ရက္ခိုင်နဲ့ထိစပ်နေတဲ့ ချင်းပြည် မင်းတပ်နဲ့ ကန်ပက်လက်မြို့ အစပ်နေရာများ နဲ့ အာရက္ခတပ်တော် လှုပ်ရှားရာ နေရာအနှံ့တွင် ဖက်ဆစ် အကြမ်းဖက် စစ်ကော်မရှင်ဟာ လူလှိုင်းအသုံးပြု ထိုးစစ်များကြောင့် တိုက်ပွဲများ ပြင်းထန်စွာ ဖြစ်ပွားလျက် ရှိနေတယ်” လို့ အာရက္ခတပ်တော်က ဇွန်လ ၂၇ ရက်မှာ ထုတ်ပြန်ပါတယ်။
ရွေးတုအစိုးရတပ်ဟာ ဂွမြို့နယ်ကို အမတ ၃၄၄ အမြောက်တပ်နဲ့ ပုသိမ်အခြေစိုက် တပ်ရင်းတွေက ထုတ်နုတ်အင်အား ၄၀၀ ကျော်နဲ့ ထိုးစစ်ဆင် တိုက်ခိုက်လာခဲ့တာဖြစ်ပြီး ယခု ထိုးစစ်ဟာ ယခု တစ်ကြိမ်မဟုတ်ဘဲ ကြိမ်ဖန်များစွာ ထိုးစစ်ဆင် တိုက်ခိုက်ခဲ့ပြီး ဖြစ်တယ်လို့လည်း အာရက္ခတပ်တော်က ဆိုပါတယ်။
အာရက္ခတပ်တော်အနေနဲ့ ရွေးတုအစိုးရတပ်ရဲ့ ထိုးစစ်တိုင်းကို အကောင်းဆုံး ခုခံစစ်နဲ့အတူ တန်ပြန်တိုက်စစ်ဆင် တိုက်ခိုက်ခဲ့လို့ ရွေးတုအစိုးရတပ်ရဲ့ ပွိုင့် ၃ ခုကို ဆက်တိုက် သိမ်းပိုက်နိုင်ခဲံတယ်လို့လည်း သိရပါတယ်။
“ ဧရာဝတီတိုင်း၊ ရေကြည်မြို့နယ်ရှိ ဖက်ဆစ် အကြမ်းဖက် စစ်ကော်မရှင်တပ်ရဲ့ ပွိုင့် (၂၈၈) ကုန်း၊ ပွိုင့် (၁၈၈) ကုန်းနဲ့ ပွိုင့် (၁၄၈) ကုန်း တို့ကို တစ်ခုပြီးတစ်ခု ဆက်တိုက် သိမ်းပိုက်ရရှိခဲ့တယ်” လို့ အာရက္ခတပ်တော်က ဆိုပါတယ်။
အဆိုပါ သိမ်းပိုက်ရရှိခဲ့တဲ့ ပွိုင့်သိမ်းတိုက်ပွဲအတွင်း ရန်သူ့အလောင်းအချိုနဲ့ လက်နက်ခဲယမ်းများ၊ စစ်အသုံးအဆောင်ပစ္စည်းအများအပြား သိမ်းဆည်းရမိခဲ့တယ်လို့လည်း အာရက္ခတပ်တော်က ထုတ်ပြန်ပါတယ်။
ရွေးတုအစိုးရတပ်နဲ့ အာရက္ခတပ်တော်တို့ ယခု ရက်ပိုင်းအတွင်း ဖြစ်ပွားနေတဲ့ တိုက်ပွဲတွေအနက် ရက္ခိုင်-ဧရာဝတီအစပ်မှာတိုက်ပွဲတွေဟာ ပိုမိုပြင်းထန်နေခဲ့တယ်လို့လည်း အာရက္ခတပ်တော်က ဆိုပါတယ်။
ရွေးတုအစိုးရတပ်ဟာ ရက္ခိုင်ပြည် ဂွမြို့နယ်အတွင်းကို ဝင်ရောက်နိုင်ဖို့ လေကြောင်းကနေ နေ့စဉ် ဗုံးကြဲတိုက်ခိုက်နေပြီး ကုန်းလမ်း၊ ရေလမ်းတို့ကနေ နည်းအမျိုးမျိုးနဲ့ ထိုးဖောက်ဖို့ ကြိုးစားလျက်ရှိနေပြီး ရက္ခိုင်-ဧရာဝတီ အစပ် နေရာတွေမှာ တိုက်ပွဲတွေ နေ့စဉ်ရက်ဆက် ပြင်းထန်နေတယ်လို့လည်း ထုတ်ပြန်ချက်မှာ ဖော်ပြထားပါတယ်။
