အာရက္ခတိုင်းမ်စ် (၇ နိုဝင်ဘာ ၂၀၂၄)
ရက္ခိုင်ပြည် နဲ့ မကွေး ဆက်ထားတဲ့ အမ်း-ပဒါန်းလမ်းပိုင်းက စစ်ကောင်စီရဲ့ ကင်းစခန်းနှစ်ခုကို တော်လှန်ရေး ၃ ဖွဲ့က ပူးပေါင်းတိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၁၀ ဦးခန့် သေဆုံးခဲ့တယ်လို့ သိရပါတယ်။
နိုဝင်ဘာ ၅ ရက်က ဂုတ်ကြီးရွာထိပ် ဘုံဘောလမ်းဆုံ နဲ့ မိုင်တိုင် ၁၁ ရှိ စစ်ကောင်စီ ကင်းစခန်းနှစ်ခုကို လူထုတော်လှန်ရေးမဟာမိတ်အင်အားစု (PRA-Magway)၊ အရှိချင်းကာကွယ်ရေးတပ်(ACDF) နဲ့ မင်းဘူးခရိုင်အမှတ်(၂) တပ်ရင်းတို့က ပူးပေါင်းတိုက်ခိုက်ခဲ့တာပါ။
တော်လှန်ရေးအင်အားစုတွေက မနက် ၁၁ နာရီကျော်မှာ စတင်တိုက်ခိုက်ခဲ့ပြီး စစ်ကာင်စီဖက်က ၁၀ ဦးခန့် သေဆုံးသွားကာ ဒဏ်ရာရရှိသူတွေကို နတ်ရေကန်လမ်းဟောင်းအတိုင်း ကား၊ ဆိုင်ကယ်တွေနဲ့ သယ်ထုတ်သွားတယ်လို့ သိရပါတယ်။
စစ်ကောင်စီဖက်က စစ်ကူတွေနဲ့ နှစ်ဖက်ညှပ်ပစ်ခတ်တာ၊ နတ်ရေကန်လေကြောင်းကာကွယ်ရေးစခန်းက ဟောင်ဝစ်ဇာတွေနဲ့ ပစ်ခတ်တာတွေကြောင့် တော်လှန်ရေးတပ် ၃ ဖွဲ့က တပ်ပြန်ဆုတ်ခဲ့ရတယ်လို့ သိရပါတယ်။
ဧရာဝတီ အနောက်ဘက်ခြမ်းဒေသ ထိန်းချုပ်စိုးမိုးနိုင်ရေးဟာ တော်လှန်ရေးအင်အားစုတွေရဲ့ စစ်ရေးရည်မှန်းချက်ဖြစ်ပြီး အခု အမ်း-ပဒါန်းလမ်းပိုင်း ထိန်းချုပ်နိုင်ရေးမှာ စစ်ရေးရည်မှန်းချက်ရဲ့ ရှေ့ပြေးလှုပ်ရှားမှုတွေဖြစ်ကြောင်း၊ အဲဒီ ဒေသအသီးသီးရှိ စစ်နယ်ဝန်းတိုးချဲ့လာမှုနဲ့အတူ တညီတညွတ်တည်း စုပေါင်းအကောင်အထည်ဖော်သွားမယ်လို့ မကွေး PRA ၊ အရှိချင်းတပ်၊ မင်းဘူးခရိုင်တပ်တို့က ပူးပေါင်းထုတ်ပြန်ထားပါတယ်။
