အာရက္ခတိုင်းမ်စ် (၂၅ နိုဝင်ဘာ ၂၀၂၄)
စစ်ဘေးဒဏ်အလူးအလဲခံစားနေရသော ပြည်သူလူထုအား ထောက်ထားညှာတာခြင်းနှင့်အတူ မိမိကိုယ်ကို ခုခံကာကွယ်ခွင့် အခွင့်အရေးကို ကိုင်စွဲထားပြီး ပြဿနာအရပ်ရပ်ကို ဖြေရှင်းနိုင်ဖို့အတွက် တွေ့ဆုံဆွေးနွေးအဖြေရှာရန် အသင့်ရှိကြောင်း ပလောင်ပြည်နယ်လွတ်မြောက်ရေးတပ်ဦး (PSLF/TNLA) က ဒီကနေ့မှာ ထုတ်ပြန်ပါတယ်။
နေ့စဉ်ရက်စက်ဖြစ်ပွားနေသော တိုက်ပွဲတွေမှာ စစ်ကောင်စီ၏ လေကြောင်းစစ်ဆင်ရေးအပါအဝင် ပြင်းထန်သော တိုက်ပွဲများကြောင့် ဒေသခံပြည်သူတွေဟာ စစ်ဘေးဒဏ်ကို ဆိုးရွားစွာ ခံစားနေရကြောင်း ဆိုပါတယ်။
ဒါ့အပြင် တရုတ်အစိုးရ၏ ကြိုးပမ်းမှုကို လေးစားအသိအမှတ်ပြု၍သော်လည်းကောင်း၊ နှစ်ဖက်ပဋိပက္ခတွေ အဆုံးသပ်နိုင်ရေး တွေ့ဆုံဆွေးနွေးရန် အဆင်သင့်ရှိကြောင်း TNLA ၏ သဘောထားကို ထုတ်ပြန်သည်ဟု ပြောပါတယ်။
၁၀၂၇ စစ်ဆင်ရေး စတင်ခဲ့ပြီး တိုက်ပွဲတွေ ပြင်းထန်ခဲ့သည်မှာ နှစ်ပတ်လည်ခဲ့ပြီဖြစ်ကြောင်း စစ်ကောင်စီရဲ့ တပ်ဖွဲ့ဝင်တွေ၊ တပ်စခန်းတွေ၊ စစ်ကြောင်းတွေကို မိမိတို့ မြို့ရွာဒေသတွေမှာ ကင်းစင်အောင် ဖယ်ရှားတိုက်ထုတ်ခဲ့ကြောင်း ဆိုပါတယ်။
စစ်ကောင်စီကလည်း ပြည်သူလူထုတွေကို ဦးတည်ပစ်မှတ်ထားပြီး လေကြောင်းနဲ့ ချေမှုန်းတိုက်ခိုက်နေတာကြောင့် အပြစ်မဲ့ ပြည်သူလူထုတွေ စစ်ဘေးဒဏ်ပေါင်းစုံကို ခံစားနေရတယ်လို့ ထုတ်ပြန်ချက်မှာ ဖော်ပြထားပါတယ်။
