အာရက္ခတိုင်းမ်စ် (၂၅ ဧပြီ ၂၀၂၆)
ရက္ခိုင်ပြည်က လွတ်မြောက်နယ်မြေတနေရာတွင် ဧပြီလ ၂၄ ရက်က ကျင်းပပြုလုပ်ခဲ့တဲ့ စတုတ္ထအကြိမ်မြောက် ခရစ်ယာန်ကျမ်းစာကျောင်း ကျောင်းဆင်းလက်မှတ် ပေးအပ်ပွဲကို ULA/AA တက်ရောက်ဂုဏ်ပြုခဲ့တယ်လို့ သိရပါတယ်။
ခရစ်ယာန်ကျမ်းစာတကျောင်းရဲ့ နွေရာသီ တလတာ ကျမ်းစာ ကျောင်းဆင်းလက်မှတ်ပေးအပ်တွင် ကျောင်းသားကျောင်းသူများကို ဆုချီးမြှင့်ခြင်း၊ ကျောင်းသား ကျောင်းသူများက ဆရာများကို အမှတ်တရ လက်ဆောင်များပေးအပ်ခြင်းနဲ့ ကျောင်းဆင်းလက်မှတ်များ ပေးအပ်ခဲ့တယ်လို့ သိရပါတယ်။
အဆိုပါ အခမ်းအနားကို ရက္ခိုင်အမျိုးသားအဖွဲ့ချုပ်/အာရက္ခတပ်တော်က တက်ရောက်ဂုဏ်ပြုခဲ့ပြီး ကျောင်းအုပ်ဆရာကြီးနဲ့ ဘာသာရေးပြ ဆရာများကို တဦးလျှင် ငွေ ၅ သိန်းကျပ်စီ ဂုဏ်ပြုငွေ ချီးမြှင့်ခဲ့တယ်လို့ သိရပါတယ်။
အဆိုပါ နွေရာသီ တလတာ ကျမ်းစာကျောင်းဆင်း လက်မှတ်ရရှိသူများမှာ Level – 1 တွင် ကျောင်းသား ကျောင်းသူ ၃၈ ဦး၊ Level – 2 တွင် ၃၆ ဦး၊ Level – 3 တွင် ၁၂ ဦး စုစုပေါင်း ၇၆ ဦး တို့ ဖြစ်တယ်လို့ သိရပါတယ်။
ရက္ခိုင်အမျိုးသားအဖွဲ့ချုပ်/အာရက္ခတပ်တော်က တာဝန်ရှိသူတွေကလည်း နွေရာသီ ၁ လတာ ကျမ်းစာကျောင်း ကို အောင်မြင်စွာ စီစဥ်သင်ကြားပေးခဲ့ကြတဲ့ ခရစ်ယာန်ဘာသာရေးပြ ဆရာများ၊ တာဝန်ရှိပုဂ္ဂိုလ်များနဲ့ စိတ်အားထက်သန်စွာ သင်ယူခဲ့ကြတဲ့ ကျောင်းသား ကျောင်းသူများကို ဂုဏ်ပြုခဲ့ပြီး လူငယ်များကို ယုံကြည်ခြင်းတွင် ခိုင်မာကြရန်၊ စာရိတ္တတွင် ဖြောင့်မတ်ကြရန်၊ ပညာရေးတွင် ထူးချွန်ကြရန်၊ လူမျိုးအကျိုးအတွက် တာဝန်ယူကြရန်၊ လူမှုရေးနဲ့ နိုင်ငံရေး တာဝန်များတွင် ပါဝင်ကြရန်၊ အမှန်တရားနဲ့ တရားမျှတမှုအတွက် ရဲရင့်စွာ ရပ်တည်ကြရန် တိုက်တွန်းနှိုးဆော်ခဲ့တယ်လို့လည်း သိရပါတယ်။
အဆိုပါ ကျောင်းဆင်း အခမ်းအနားကို လူပေါင်း ၂၀၀ ကျော်ခန့် တက်ရောက်ခဲ့ကြပြီး အခမ်းအနားကို တက်ရောက်လာတဲ့ ဧည့်သည့်တော်များကို ထမင်းနဲ့ တည်ခင်းဧည့်ခံ ကျွေးမွေးခဲ့ကြပြီး ညပိုင်းတွင် ဂီတ၊ အဆို၊ အကများ ဖျော်ဖြေရေး အစီစဉ်များနဲ့လည်း ဖျော်ဖြေခဲ့ကြတယ်လို့ သိရပါတယ်။
Ref & Photo – One Nation News
