မာန်အောင်မှာ ဆေးဝါး ‌ဈေးအဆမတန်မြင့်မားတဲ့အပြင် ဆေးဝါးရှားပါးနေ

အာရက္ခတိုင်းမ်စ်(၃၁ ဒီဇင်ဘာ ၂၀၂၅)

ရက္ခိုင်ပြည်၊ မာန်အောင်မြို့မှာ ဆေးဝါးများ ‌ဈေးအဆမတန်မြင့်မားတဲ့အပြင် ဆေးရှားပါး ပြတ်လပ်နေတယ်လို့ ဒေသခံတွေက အာရက္ခတိုင်းမ်စ်ကို ဆိုပါတယ်။

ဆေးဝါးတွေကို ရန်ကုန်ကတဆင့် ကုန်သင်္ဘောနဲ့ သယ်ဆောင်ရတာကြောင့် သယ်ယူစရိတ် ဈေးကြီးတဲ့အပြင် ကုန်သင်္ဘောတွေဟာလည်း လပိုင်း အတော်ကြာမှ တခေါက်ရောက်တာကြောင့်ဆေးရှားပါး ပြတ်လပ်နေတာ ဖြစ်တယ်လို့သိရပါတယ်။

မာန်အောင်မြို့ကဒေသခံတဦးက “ လက်ရှိကတော့ ကျနော်တို့ဒေသက စစ်တပ်ထိန်းချုပ်ထားတဲ့ နယ်မြေတခု၊ ထိန်းချုပ်ထားတဲ့ နယ်မြေ ၃ခု ရှိတာပေါ့။ အဲဒီထဲမှာ မာန်အောင်လည်း အပါအဝင်ပေါ့။ လက်ရှိ ကုန်ဈေးနှုန်းအရ ဆိုလို့ရှိရင် ဒီမှာ ဈေးကြီးတယ်။ ဆေးဈေးနှုန်းတွေလည်း ဈေးတွေ မြင့်နေတာပဲ။ လုံလောက်မှု မရှိပါဘူး။‌ ဆေးက ပစ္စည်းအကုန်ပြတ်နေတာကို။ ဆေးရှားပါးတာကတော့ ကြာပါပြီ။ ဒါပေမယ့် ဆေးတွေက မဝင်ဘူးလားဆိုတော့လည်း ဝင်တယ်။ ရန်ကုန်ကတဆင့် သင်္ဘောနဲ့ ဝင်တာပေါ့။ သင်္ဘောနဲ့ ဝင်တော့လည်း အဲဒီ သင်္ဘောနဲ့ ဝင်တာက အဆင့်ဆင့် ပေးရတာရှိတယ်လေ။ ကျနော်တို့ဒီမှာ ဒီဘက်ခြမ်းမှာလည်း ပေးကမ်းရတာ ရှိတဲ့အခါကျ ဟုတ်ကဲ့ ဈေးပိုမြင့်သွားတဲ့သဘော ဖြစ်တာပေါ့။ ကျနော်တို့ဒေသက သင်္ဘောတွေက နှစ်လသုံးလနေမှ တခေါက်ရောက်တာကို။ ဆိုတော့ ‌နောက်ပြီးကျရင် သင်္ဘောစရိတ်တွေကလည်း ဈေးကြီးတယ်။ ဆေးဝါးကျ ပိုပြီးပေးရတယ်။ တချို့ဆေးဝါးတွေ တော်တော်များများ ဆေးဝါးတွေက သူတို့ကန့်သတ်ထားတဲ့အပိုင်းတွေ ရှိတယ်လေ။ ကန့်သတ်ထားတဲ့ အပိုင်းတွေရှိတဲ့အခါကျ ဆေးဝါးတင်ဆောင်ခွင့် လွှဲတဲ့အခါမျိုးမှာဆိုရင် တချို့အပိုင်းတွေကျ မသိတဲ့အခါမျိုးတွေ ရှိတာပေါ့။ ဒါပေမယ့် ကျနော်တို့မှာကျ ခံစားချက်တခုတော့ ရှိတာပေါ့။ ဘာလဲဆိုရင် AA ထိန်းချုပ်ထားတဲ့နေရာမှာလည်း ဆေးဝါးပြတ်တယ်။ အဲဒါလေးတခုတော့ စိတ်ထဲမှာ နည်းနည်းလေး မကောင်းဘူးပေါ့။ အဲဒါလေးတွေကတော့ လိုချင်တာပေါ့နော်။ ဘာလဲဆိုရင် ကျနော်တို့က ဆေးဝါးပဲဖြစ်စေ ကျန်တဲ့အပိုင်းပဲဖြစ်စေ ကျနော်တို့ဘက်ကကျ တော်တော်လေး အခက်အခဲ ရှိပါတယ်” လို့ အာရက္ခတိုင်းမ်စ်ကို ပြောပါတယ်။

မာန်အောင်မှာ မြို့နယ်ပြည်သူ့ ဆေးရုံ ရှိ‌ပေမယ့် နိုင်ငံရေး၊ စစ်ရေးအခြေအနေတွေကြောင့် ဆေးကုသပေးမယ့် ဆရာဝန်တဦးတည်းသာရှိသလို ဆေးရုံမှာ လိုအပ်တဲ့ဆေးဝါး လုံလောက်မှု မရှိတာကြောင့် ပြင်ပက ဝယ်ယူရတဲ့အတွက် စရိတ်ပိုမိုကုန်ကျတာ ဖြစ်တယ်လို့ ဒေသခံတွေက ဆိုပါတယ်။

“ ဒီမှာက ကျနော်တို့ ဆေးကုသရေး အပိုင်းတွေကျ ရန်ကုန်ကိုပဲအဓိက မှီခိုပြီးသွားတဲ့အခါကျ သွားရေးလာရေးကျ အဆင်မပြေ‌ဘူးလေ။ ရန်ကုန်ကျလို့ရှိရင် သင်္ဘောဆိုလို့ရှိရင် ကျနော်တို့ မာန်အောင်ကနေ ရန်ကုန်ထိဆို ကျနော်တို့ အရင်တုန်းက ၄သိန်း၊ ၅သိန်း တချို့က အဲဒီအချိန်မှာ ပွဲစားတွေနဲ့ လုပ်လိုက်ကြတော့ ၁၀သိန်း၊ ၁၅သိန်း ပေါက်တဲ့အခါမျိုးလည်း ရှိတာပေါ့။ အဲဒါတွေက ဘာလဲဆိုရင် ဒီအောက်ခြေမှာက ဘာခေါ်မလဲ အဲဒီ့ လာဘ်ပေးလာဘ်ယူမှု အပိုင်းတွေလည်း ရှိကြတယ်လေ။ အဲ့ဒီအပိုင်းပေါ်မှာပဲ တခါတလေကျ မူတည်တယ်ပေါ့‌နော်။ ကျန်းမာရေးလည်း အခက်ခဲတွေ ရှိတာပေါ့နော်” လို့ ဒေသခံတဦးက အာရက္ခတိုင်းမ်စ်ကို ပြောပါတယ်။

ရက္ခိုင်ပြည်၊ မာန်အောင်မြို့မှာ ရပ်ကွက် ၅ ခုနဲ့ ကျေးရွာပေါင်း ၃၀ကျော်ရှိပြီး လက်ရှိမှာတော့ စကမ က ထိန်းချုပ်ထားတာပဲ ဖြစ်ပါတယ်။