အာရက္ခတိုင်းမ်စ် (၂၇ ဧပြီ ၂၀၂၆)
အာရက္ခတပ်တော် ထိုးစစ်ဆင်နေတဲ့ နယ်မြေက စစ်ကော်မရှင်ခန့်အပ်ထားတဲ့ နတခ တိုင်းမှူး ၅ ဦး အထိ ပြောင်းလဲခံခဲ့ရတယ်လို့ သိရပါတယ်။
အနောက်တောင်တိုင်းစစ်ဌာနချုပ် (နတခ) တိုင်းမှူးသစ်အဖြစ် ဗိုလ်မှူးချုပ် အောင်ကျော်ခိုင် (စတသ-၃၃) ကို အာဏာသိမ်း စစ်ခေါင်းဆောင် သမ္မတ မင်းအောင်လှိုင်က ခန့်အပ်လိုက်ပါတယ်။
တိုင်းမှူးသစ်အဖြစ် ဗိုလ်မှူးချုပ် အောင်ကျော်ခိုင် မတိုင်ခင်မှာတော့ ဗိုလ်ချုပ် စိုးကျော်ထက်ဖြစ်ပြီး သူ့ကိုတော့ တောင်ပိုင်းတိုင်းစစ်ဌာနချုပ် (တပခ) တိုင်းမှူးအဖြစ် ပြောင်းရွှေ့လိုက်တာလည်း ဖြစ်ပါတယ်။
အနောက်တောင်တိုင်းစစ်ဌာနချုပ် (နတခ) တိုင်းမှူးသစ် ဗိုလ်မှူးချုပ် အောင်ကျော်ခိုင်ဟာ ယခင်က ဒေသကွပ်ကဲမှုစစ်ဌာနချုပ် (ဒကစ) လွိုင်ကော်တွင် ဒကစမှူးအဖြစ် တာဝန်ယူခဲ့သူလည်း ဖြစ်ပါတယ်။
အနောက်တောင်တိုင်းစစ်ဌာနချုပ် (နတခ) တိုင်းမှူးများအဖြစ် ဗိုလ်ချုပ် အောင်အောင်၊ ဗိုလ်ချုပ် ကြည်ခိုင်၊ ဗိုလ်ချုပ် ဝေလင်း၊ ဗိုလ်ချုပ် စိုးကျော်ထက်နဲ့ လက်ရှိ ဗိုလ်မှူးချုပ် အောင်ကျော်ခိုင်အပါအဝင် တိုင်းမှူး ၅ ဦးအထိ ပြောင်းလဲခဲ့တာလည်း ဖြစ်ပါတယ်။
အာဏာသိမ်း စစ်ခေါင်းဆောင် သမ္မတ မင်အောင်လှိုင် ခန့်အပ်ထားတဲ့ တပ်ချုပ်အသစ် ရဲဝင်းဦး လက်ထက်တွင် အနောက်တောင်တိုင်းစစ်ဌာနချုပ် (နတခ)၊ အနောက်ပိုင်းတိုင်းစစ်ဌာနချုပ် (နပခ)၊ တပခ နဲ့ ရတခ တိုင်းမှူးနေရာများကို အပြောင်းအလဲတွေ ပြုလုပ်နေတာလည်း ဖြစ်ပါတယ်။
250 comments