ရီရီလှိုင်(ကစ္ဆပမြီ)
ရုရှားနိုင်ငံ ပြန်လည်ထူထောင်ရေးကာလက ကာတွန်းတကွက်ကို စာရေးသူ မှတ်မိနေပါသေးတယ်။ အချိန်ကာလအားဖြင့် ဆိုဗီယက် ပြည်ထောင်စုကြီး ပြိုကွဲပြီး ရုရှားနိုင်ငံကို အင်တိုက်အားတိုက် ပြန်လည် ထူထောင်နေကြချိန် ဖြစ်ပါတယ်။ အဲဒီအချိန်မှာပဲ ရုရှားနိုင်ငံ ပြည်သူလူထုတချို့ရဲ့ စိတ်ဓာတ်အခြေအနေကို ထင်ဟပ်ပြတဲ့ သရော်ကာတွန်းတကွက် ထွက်ပေါ်လာခဲ့တာပါ။
ကာတွန်းပြကွက်က ရှင်းပါတယ်။ ဟိုက်ဝေးလမ်းမပေါ်မှာ လူအပြည့် တင်ဆောင်ထားတဲ့ ကားတစီး အရှိန်ပြင်းပြင်းနဲ့ မောင်းနှင်နေပါတယ်။ ကားရဲ့ ကိုယ်ထည်ပေါ်မှာ “ ရုရှားသည် အမေရိကန်ကို အမှီ လိုက်နိုင်ရမည်” ဆိုတဲ့ ဆောင်ပုဒ်ကြီးကို ကပ်နှိပ်ထားပါတယ်။ ကားပေါ်မှာ လိုက်ပါလာကြသူ အများစုကလည်း အဲဒီဆောင်ပုဒ်ကို လက်သီးလက်မောင်းတန်းပြီး ကြွေးကြော်လာကြပါတယ်။ တနေရာကိုရောက်တော့ ကားရဲ့နောက်မှာ တွယ်ပြီး ကပ်လိုက်ပါလာသူတယောက်က ကားဒရိုင်ဘာကို လှမ်းပြီး အော်ပြောလိုက်ပါတယ်။ “ ဒရိုင်ဘာရေ… အမေရိကန်ကို မှီလာရင် ပြောပါဗျို့… ကျုပ် အမေရိကန်မှာ ဆင်းကျန်ခဲ့မလို့ဗျို့… ခင်ဗျားတို့ချည်းပဲ အမေရိကန်ကို ကျော်တက်သွားလိုက်ကြပါ”
အဲဒီကာတွန်းကို သတိရမိတော့ စာရေးသူတို့ရဲ့ အာရက္ခပြည် ပြန်လည်ထူထောင်ရေးနဲ့ ဆက်စပ် တွေးတောစရာတွေ ရှိလာပါတော့တယ်။
ဟုတ်ပါတယ်။ နိုင်ငံတိုင်း၊ လူမျိုးတိုင်းမှာ မိမိနိုင်ငံနဲ့ မိမိလူမျိုးကို အထင်မကြီး၊ မလေးစားဘဲ တိုင်းတပါးကိုသာ အထင်ကြီး လေးစားတတ်တဲ့ လူစားမျိုးတွေ ရှိနေတတ်ကြပါတယ်။ ရုရှားနိုင်ငံ ပြန်လည်ထူထောင်ရေးကို သရော်ထားတဲ့ ကာတွန်းထဲကလို လူစားမျိုးတွေဟာ အာရက္ခပြည် ပြန်လည်ထူထောင်ရေးထဲမှာလည်း အမှန်တကယ်ပဲ ရှိနေကြပါတယ်။ စာရေးသူတို့ရဲ့ အာရက္ခပြည်ထဲမှာဆိုရင် ကိုယ့်ပြည်၊ ကိုယ့်မြေ၊ ကိုယ့်ရေနဲ့ ကိုယ်ပိုင် အချုပ်အခြာအာဏာ ပြန်လည်တည်ဆောင်ရေးကို မယုံကြည်နိုင်ကြသေးတဲ့ သို့မဟုတ် လက်မခံနိုင်ကြသေးတဲ့ လူတန်းစားတရပ် ရှိနေတာကို တွေ့မြင်နေရသလို ပြန်လည်ထူထောင်ရေးလုပ်ငန်းစဉ်တွေကို ဘေးထိုင် ဘုပြောနေကြတဲ့ အရောင်စုံ နိုင်ငံရေး ကဏန်းကောင်တွေ၊ ဗမာ ကိုလိုနီအစွဲ မချွတ်နိုင်ကြသေးတဲ့ ဖျက်ပိုးတွေနဲ့ သာပေါင်းညာစားတွေကိုပါ တွေ့မြင်နေရပါတယ်။
ဒါ့အပြင် အခု ရေတွင်းတူးပြီး အခုချက်ချင်း ရေကြည် သောက်ချင်ကြသူများကိုလည်း အများအပြားပဲ မြင်တွေ့နေရသေးတယ်။ ဒီလို လူတန်းစားမျိုးတွေကို မြင်ရတော့ ဗမာပြည် နိုင်ငံရေးထဲမှာ “ ပြည်သူတွေ ဆန္ဒ မစောကြပါနဲ့” လို့ တောင်းပန်စကား ပြောဆိုခဲ့ဖူးတဲ့ သမ္မတ ဒေါက်တာမောင်မောင်ကို မဆီမဆိုင် ပြေး သတိရမိပါတယ်။ ဟုတ်ပါတယ်။ ထိုက်သင့်တဲ့ ပေးဆပ်မှုနဲ့ အချိန်ကာလတခုကို ဖြတ်ကျော်ပြီးမှသာ သင့်တော်တဲ့ အခြေအနေတခုကို ရရှိလာကြတာဖြစ်ပါတယ်။ မအောင့်အီး မစောင့်ဆိုင်းနိုင်ဘဲ သို့မဟုတ် ထိုက်သင့်တဲ့ ကြိုးစား အားထုတ်မှု မရှိဘဲနဲ့တော့ ဘယ်အရာကိုမှ အလွယ်တကူ ရရှိနိုင်မှာ မဟုတ်ပါဘူး။ လူသားသမိုင်းကို ပြန်ကြည့်မယ်ဆိုရင်လည်း အခက်အခဲနဲ့ အချိန်ကာလပေါင်းများစွာကို ကျော်လွန်ဖြတ်သန်းပြီးမှသာ ထိုက်သင့် ကောင်းမွန်တဲ့ အခြေအနေကို ရောက်ရှိလာခဲ့ကြတာပဲ ဖြစ်ပါတယ်။ ဒီလို အခြေအနေကို အကျိုးအကြောင်းကိုတော့ လူတိုင်း နားလည်ထားသင့်ပါတယ်။
လက်ရှိ အာရက္ခပြည်ရဲ့ အခင်းအကျင်း အခြေအနေကို ပြန်ကြည့်ရင် အာရက္ခတပ်တော် AA ဟာ နိုင်ငံရေး၊ စစ်ရေးနဲ့ ပြန်လည်ထူထောင်တည်ဆောက်ရေးကိစ္စအဝဝကို တပြိုင်တည်း တချိန်တည်း တည်ဆောက်နေရချိန် ဖြစ်တဲ့အတွက် အလွန်တရာကို အလုပ်များနေချိန်လို့ သုံးသပ်ရပါတယ်။ အာရက္ခတပ်တော် AA ဟာ တိုက်ခိုက်သိမ်းပိုက်ဖို့ ကျန်ရှိနေသေးတဲ့ ကျောက်ဖြူ၊ စစ်တွေနဲ့ မာန်အောင်ကျွန်းတို့မှာသာမကဘဲ အာရက္ခပြည်နဲ့ ဗမာပြည်နယ်စပ် မြို့နယ်တွေ၊ ဘင်္ဂလားဒေ့ရှ်နဲ့ အာရက္ခပြည်နယ်စပ် မြို့နယ်တွေကို လုံခြုံအောင် ကာကွယ်နေရပါသေးတယ်။ ဒါ့အပြင် ဗမာစစ်အာဏာရှင်စနစ် အဆုံးသတ်ရေးအတွက် နွေဦးတော်လှန်ရေး မဟာမိတ်အင်အားစုတွေနဲ့လည်း လက်တွဲ တိုက်ပွဲဝင်နေရပါသေးတယ်။
စစ်ရေးစစ်ရာ ကဏ္ဍမှာ ထိုးစစ်ကိုရော ကာကွယ်စစ်ကိုပါ ဆင်နွှဲနေရသလို တဖက်ကလည်း ထိန်းချုပ်ထားနိုင်ပြီးတဲ့ မြို့နယ် ၁၄ ခုကို ပြန်လည်တည်ဆောက်ရေးလုပ်ငန်းတွေ ဆောင်ရွက်နေရပါတယ်။ ဒါ့အပြင် နိုင်ငံတကာရဲ့ ယုံကြည်မှုကို တည်ဆောက်ရေးနဲ့ ပြည်တွင်းမဟာမိတ် အရေးကိစ္စတို့ကိုပါ အမြော်အမြင်ရှိစွာ ကိုင်တွယ် ဖြေရှင်းနေရချိန်ဖြစ်လို့ အလွန်တရာမှ ခက်ခဲတဲ့ အခြေအနေထဲမှာ ရှိနေလိမ့်မယ်လို့ သုံးသပ်ရပါတယ်။ ဘာပဲဖြစ်ဖြစ် အာရက္ခတပ်တော်နဲ့ သူ့ရဲ့ နိုင်ငံရေးအဖွဲ့အစည်းဟာ အခိုက်အတန့် အခက်အခဲတွေကို ကျော်လွှားသွားနိုင်လိမ့်မယ် ဆိုတာကတော့ သေချာသလောက် ဖြစ်ပါတယ်။ ဒါကိုလည်း ရက္ခိုင်ပြည်တွင်းက မြို့နယ် ၁၄ မြို့နယ်အထိကို တိုက်ခိုက် သိမ်းပိုက်ပြီးတော့ သက်သေပြထားပြီး ဖြစ်ပါတယ်။
ဒီနေရာမှာ နိုင်ငံရေးစကားတခွန်းကို စာရေးသူ သတိရမိနေပါတယ်။ နံရံကို ခေါင်းနဲ့တိုက်တယ်ဆိုတဲ့ စကားပဲ ဖြစ်ပါတယ်။ ဒီစကား ဖြစ်ပေါ်လာပုံ အဖြစ်အပျက် အခင်းအကျင်းကတော့ အာရက္ခပြည်ရဲ့ အခြေအနေ အခင်းအကျင်းနဲ့ တူညီနေတာ အမှန်ပါပဲ။ အာရက္ခတပ်တော် AA ရဲ့ တပ်မှူးချုပ်က ရက္ခိုင်တပြည်လုံးကို တမြို့မှချန်မထားဘဲ တိုက်ခိုက် သိမ်းပိုက်မယ်လို့ ကြွေးကြော်လိုက်ချိန်မှာ ဗမာစစ်တပ် ဘက်တော်သားတချို့ရဲ့ ပြက်ရယ်ပြုခြင်းကို ခံခဲ့ရပါသေးတယ်။ လွတ်လပ်ရေး ရပြီးချိန်ကစလို့ နှစ်ပေါင်း ၇၀ ကျော် ကာလအတွင်းမှာ စနစ်တကျ ယိုပေါက်မရှိအောင် တည်ဆောက်လာခဲ့တဲ့ ဗမာစစ်တပ်ကို ဆယ်စုနှစ် တခုစာလောက်သာ သက်တမ်းရှိသေးတဲ့ အာရက္ခတပ်တော်အနေနဲ့ တော်လှန်ပုန်ကန်တယ်ဆိုတာ ကြီးမားခိုင်ခံ့တဲ့ အုတ်နံရံကြီးကို ဦးခေါင်းနဲ့ တိုက်ပြီး ဖြိုခွင်းဖို့ ကြိုးစားတာပဲလို့ စစ်တပ် ဘက်တော်သား အများစုက ထင်ကြေး ပေးခဲ့ကြပါတယ်။ ဒါပေမဲ့ အာရက္ခတပ်တော်ဟာ အမှန်တကယ်ပဲ ဗမာစစ်တပ်ဆိုတဲ့ နံရံကြီးကို ခေါင်းနဲ့တိုက်ပြီးတော့ ဖြိုခွင်း ပြလိုက်တာပါပဲ။ တကယ်တော့ လူအများစု ထင်တာက နံရံကို ဦးခေါင်းခွံနဲ့တိုက်ပြီး ဖြိုခွင်းပစ်တာမျိုး မဟုတ်ပါဘူး။ အာရက္ခတပ်တော်ရဲ့ အမြော်အမြင်ရှိတဲ့ ခေါင်းဆောင်ပိုင်းတွေက ဦးခေါင်းထဲက ဦးနှောက်နဲ့ နံရံကြီးကို တိုက်ခိုက် ဖြိုခွင်းပစ်လိုက်ကြတာပဲ ဖြစ်ပါတယ်။ ဒီလိုပါပဲ အာရက္ခတပ်တော်ဟာ ရင်ဆိုင် ကြုံတွေ့လာနိုင်တဲ့ ဘယ်လို အခက်အခဲမျိုးကိုမဆို ဦးခေါင်းနဲ့ ထပ်မံ တိုက်ပြ ဖြိုခွင်းပစ်နိုင်လိမ့်မယ်ဆိုတာ ယုံမှား သံသယ မရှိလှပါဘူး။
ဒါပေမဲ့ ULA/AA အနေနဲ့ သတိထားရမှာက ပြန်လည် တည်ဆောက်ရေးထဲက ဖျက်မြင်းတွေအကြောင်းပဲ ဖြစ်ပါတယ်။ စာရေးသူတို့ရဲ့ အာရက္ခပြည်တော်ဟာ နှစ်ပေါင်း ၂၄၀ ထိတိုင် တိုင်းတပါး ဖိနှိပ်ခံ ကျွန်သဘောက်ဘဝ အဆင့်ဆင့်ကို ဖြတ်ကျော်လာခဲ့ကြရတာဖြစ်လို့ လူတဦးချင်းစီကစလို့ သူတို့ရဲ့ စိတ်ဓာတ်ကို ကာလတခုအထိ ပြုပြင် ပြောင်းလဲယူရမယ်ဆိုတဲ့ အချက်ပါပဲ။
အင်္ဂလိပ် ကိုလိုနီစနစ်နဲ့ ဖက်ဆစ်ဂျပန် စနစ်တို့ဟာ ရက္ခိုင်ဒေသကို နယ်မြေချဲ့ထွင်ရေးနဲ့ ပါဝါတည်ဆောက်ရေးအတွက်လောက်ကို ရည်မှန်းပြီးတော့ နယ်ချဲ့သိမ်းပိုက်ခဲ့ကြတာလို့ ယူဆကြည့်ကြရအောင်ပါ။ ဆိုလိုတာက အင်္ဂလိပ်နဲ့ ဂျပန်တို့ဟာ ရက္ခိုင်လူမျိုးတို့ကို ရက္ခိုင်စိတ်ပျောက်ပြီး အင်္ဂလိပ်စိတ်၊ ဂျပန်စိတ်တွေဝင်အောင် စနစ်တကျ ဝါဒမှိုင်းတိုက်ခြင်းမျိုးတွေ မပြုလုပ်ခဲ့ကြပါဘူး။ ဒါပေမဲ့ လွတ်လပ်ရေးရပြီးနောက်ပိုင်း အမည်ခံ ပြည်ထောင်စုထဲက ရက္ခိုင်တို့အခြေအနေကတော့ စနစ်တကျ ဗမာကိုလိုနီ ပြုခြင်းကို ခံလာခဲ့ကြရပါတယ်။ ဒါကြောင့်ပဲ ရက္ခိုင်လူမျိုးတို့ဟာ ဗမာ့နိုင်ငံရေးရဲ့ အရောင်အမျိုးမျိုး စွန်းထင်းနေခဲ့ကြရပါတယ်။ ဒီလို အစွန်းအထင်းတွေကို အစွန်းချွတ်ဖို့အတွက် ကာလတခုအထိ အချိန်ယူကြရဦးမယ်ဆိုတာကလည်း သေချာလှပါတယ်။
ဒီနေရာမှာ အမေရိကန်သမ္မတတယောက်ပြောဖူးတဲ့ ပြန်လည်တည်ဆောက်ရေးကာလက စကားတစ်တခွန်းကို စာရေးသူ သတိရမိပါတယ်။ ကိုလိုနီ ပြုခံခဲ့ရတဲ့ ပြည်သူလူထုရဲ့ စိတ်ဓာတ်တွေကို ပြန်လည်ပြုပြင်ရေးအတွက် အချိန်အကြာကြီး ရင်းနှီးပေးဆပ်ရမှာဖြစ်လို့ နစ်နာကြေး ပေးသင့်တယ်ဆိုတဲ့ တောင်းဆိုမှုပါပဲ။ မှန်ပါတယ်။ ရုပ်ဝတ္တု ပစ္စည်းတွေနဲ့ မြင်နိုင်တဲ့ အရာတွေကို ပြန်လည်ပြုပြင် တည်ဆောက်ရတာဟာ သိပ်ပြီးတော့ မခက်ခဲလှသလို အချိန်အားဖြင့်လည်း ထိုက်သင့်သလောက်သာ ကြာမြင့်မှာ ဖြစ်ပါတယ်။ ဒါပေမဲ့ မမြင်နိုင်တဲ့ လူတွေရဲ့ စိတ်၊ သို့မဟုတ် စနစ်တကျ ဖျက်ဆီးခံထားရတဲ့ စိတ်ဓာတ်ပိုင်းဆိုင်ရာကို ပြန်လည်ပြုစု ပျိုးထောင်ရတာကတော့ အလွန်တရာ ခက်ခဲပြီးတော့ အချိန်ကြာမြင့်ကောင်း ကြာမြင့်နိုင်ပါတယ်။ လက်ရှိ အာရက္ခပြည်ထဲမှာလည်း ခေါက်ရိုးကျိုးနေတဲ့ စရိုက်ဆိုး၊ အကျင့်ဆိုးတွေ၊ ငါတကော အတ္တစွဲတွေနဲ့ သခင်အားရ ကျွန်ပါးဝစိတ်ဓာတ်တွေကို တဦးတယောက်ချင်းစီရဲ့ စိတ်ဓာတ်ထဲက ပြုပြင်ပြောင်းလဲပစ်နိုင်ဖို့ အချိန်တွေ အများကြီး ရင်းနှီး ပေးဆပ်ကြရဦးမှာပဲ ဖြစ်ပါတယ်။
တကယ်တော့ ပြန်လည်တည်ဆောက်ရေးဆိုတဲ့ စကားလုံးဟာ အပြောလွယ်ပြီး လှပသလောက် တကယ့်လက်တွေ့မှာ အလွန်တရာ သိမ်မွေ့ပြီး ခက်ခဲတဲ့ ကိစ္စတွေပဲ ဖြစ်ပါတယ်။ ပြန်လည်တည်ဆောက်ရေးကို လိမ္မာပါးနပ်စွာ၊ အမြော်အမြင်ရှိစွာနဲ့ စနစ်တကျ မကိုင်တွယ်တတ်ရင် စစ်ရေးမှာ အသားစီးရရှိထားခဲ့ပေမဲ့လည်း နိုင်ငံရေးမှာ ကျရှုံးပြည် Fail State ဖြစ်သွားနိုင်ပါတယ်။
လက်ရှိ အာရက္ခပြည်ရဲ့ ပြန်လည်ထူထောင်ရေး အခင်းအကျင်းမှာ မျိုးစေ့မမှန်သူတွေ အများအပြား နေရာယူထားတာကို မြင်တွေ့နေရတဲ့အတွက် ရင်လေးမိတာ အမှန်ပါပဲ။ အာဏာပါဝါနဲ့ လုပ်ပိုင်ခွင့်ကို မက်မောသူ၊ ရရှိလာနိုင်မဲ့ အကျိုးအမြတ်ကို မျှော်ကိုးသူတွေ အလွန်ပဲ များပြားနေပါတယ်။ ခက်ခဲကြမ်းတမ်းတဲ့အာရက္ခပြည်သူ့တော်လှန်ရေးမှာ ပေးဆပ် အနစ်နာခံမှု တစုံတရာ မရှိခဲ့ဖူးပေမဲ့ ပွဲလန့်တုန်း ဖျာခင်းမဲ့သူတွေ ဒုနဲ့ဒေး ရှိနေပါတယ်။ ပြန်လည်တည်ဆောက်ရေးလိုအပ်ချက်အရ ယာယီထုတ်ပြန်ထားရတဲ့ ဒေသန္တရ ဥပဒေလို ညွှန်ကြားချက်မျိုးကို လက်တလုံးခြား လှည့်စားနေတဲ့ ခါတော်မီမျိုးချစ်တွေ၊ လုပ်ပိုင်ခွင့်ရှိသူ တွေကို ခါးပိုက်ထဲထည့်ပြီး စီးပွားရှာနေသူတွေ၊ နှလုံးသားနဲ့ လက်နဲ့ တည်ဆောက်နေတဲ့ အာရက္ခပြည်သူ့အစိုးရယန္တရားကို ခြေထောက်တွေနဲ့ စကားလုံးတွေနဲ့ အားမနာတမ်း ဖျက်ဆီးနေကြသူတွေ အလွန်ပဲ ပေါများနေပါတယ်။ မြေပြင်အနေအထားပေါ်က အုပ်ချုပ်ရေး၊ ကျန်းမာရေး၊ ပညာရေးနဲ့ စီးပွားရေးပိုင်းဆိုင်ရာ အခြေခံမဏ္ဍိုင်ကြီးတွေကို စနစ်တကျ ဖြစ်လာဖို့ဆိုရင် အဲဒီဌာနတွေမှာ မျိုးစေ့မှန်တဲ့ လူတော်လူကောင်းတွေ လိုအပ်ပါလိမ့်မယ်။ ဒီလိုမှ မဟုတ်ရင်တော့ တောင်းပေါက်နဲ့ ဖားကောက်သလိုပဲ အချိန်ကုန် လူပန်းပြီး လုပ်သမျှ အရာမထင် ဖြစ်နေဦးမှာ သေချာပါတယ်။ ဟိုအရင် ဗမာအစိုးရအဆက်ဆက်က တရားသဖြင့် ဖြစ်စေ၊ မတရားသဖြင့် ဖြစ်စေ တစုံတရာကို ရရှိချင်တယ်ဆိုရင် ဘယ်ဗိုလ်ကြီးနဲ့ ပြောထားပြီးပြီ၊၊ ဘယ်ဌာနက ဘယ်ဦးစီးနဲ့ ပြောထားပြီးပြီ၊ ဘယ်အရာရှိနဲ့ ဘယ်လိုတော်စပ် ပတ်သက်တယ်ဆိုတဲ့ အကြောင်းပြချက်တွေ ပေးပြီးတော့ အလိုရှိရာကို ခရီးပေါက်နိုင်ကြသလိုပဲ လက်ရှိ အာရက္ခပြည်ပြန်လည်ထူထောင်ရေးကာလမှာလည်း ဘယ်တိုက်နယ်မှူး၊ ဘယ်အုပ်ချုပ်ရေးမှူး၊ ဘာမှူး၊ ညာမှူးတွေကို အခွင့်အရေးသမားတွေ ပါးစပ်ထဲက မနားတမ်း ကြားနေကြရပါတယ်။
တကယ်တော့ တိုင်းပြည်နဲ့ လူမျိုးလွတ်မြောက်ရေးအတွက် အသက်၊ ခန္ဓာကိုယ်လက်တွေကို ပေးဆပ် စွန့်လွှတ် တိုက်ပွဲဝင်ထားခဲ့ကြတဲ့၊ တိုက်ပွဲဝင်နေကြဆဲဖြစ်တဲ့ အာရက္ခ မျိုးချစ်သူရဲကောင်း ရဲဘော်တွေကို ဒီကာလမှာ အားနာသင့်ပါတယ်။ ကိုယ့်ပြည်နဲ့ ကိုယ့်လူမျိုးအနာဂတ် ကောင်းစားရေးနဲ့ လက်ရှိ သာယာလှပရေးကိုသာ ရှေးရှု အလုပ်လုပ်ကြဖို့ လူတဦးချင်းစီမှာ လိုအပ်နေတာ အမှန်ပါပဲ။ အပြစ်ပြောဖို့၊ ဝေဖန်ဖို့အလုပ်ကို လူတိုင်းက လုပ်တတ်ကြပေမယ့် အပြစ်ပြောမခံရအောင် ဝေဖန်ခြင်း မခံရအောင် လုပ်ကိုင်ရေးကိုတော့ လူတိုင်းက မတတ်နိုင်ကြပါဘူး။ ကိုယ်ဝေဖန်နေသလို၊ ကိုယ်အပြစ်ပြောနေသလို ကိုယ်ကိုယ်တိုင်ကကော အပြစ်ကင်းရဲ့လား ဆိုတာကိုတော့ ပြန်လည် သုံးသပ်ကြရမှာပဲ ဖြစ်ပါတယ်။
နိဂုံးချုပ်အနေနဲ့ ပြောရရင် ULA/AA ဟာ ကြီးမားခိုင်ခံ့တဲ့ စစ်ရေးတံတိုင်းကြီးကို ခေါင်းနဲ့တိုက်ပြီး ဖြိုခွင်းလာခဲ့ပြီး ဖြစ်ပါတယ်။ အောင်လည်း အောင်မြင်လာခဲ့ပြီး ဖြစ်ပါတယ်။ အောင်မြင်နေဆဲလည်း ဖြစ်ပါတယ်။ အဲဒီအောင်မြင်မှုကို ပြန်လည်တည်ဆောက်ရေးကာလမှာ ဆက်လက် ထိန်းထားပြီးတော့ အလှပဆုံး အနာဂတ်ဆီသို့ ဆက်လက် ချီတက်ကြဖို့ လိုအပ်နေပါတယ်။ ဘာပဲပြောပြော အာရက္ခတပ်တော်အနေနဲ့ ခေါင်းနဲ့တိုက်ပြီး ဖြိုခွင်းတည်ဆောက်ရဦးမဲ့ ပြန်လည်တည်ဆောက်ရေးမှာတော့ ရေကန်တူးစဉ်မှာ မပါခဲ့သူတွေ၊ ရေကန်ပြုပြင်ရာမှာ မပါဝင်ခဲ့သူတွေအားလုံး အလံတော်တခုတည်းအောက်က တစိတ်တဝမ်းတည်း တက်ညီလက်ညီ ပူးပေါင်းပါဝင်ပေးကြဖို့ လိုအပ်နေတာ အမှန်ပဲ ဖြစ်ပါတယ်။ ရုရှားနိုင်ငံ ပြန်လည်တည်ဆောက်ရေးကာလက သရော်ကာတွန်းထဲကလို အမေကျော်ပြီး ဒွေးတော်ကို လွမ်းချင်တာတွေ၊ တကိုယ်ရေ တကာယ အတ္တတွေနဲ့ မကောင်းတဲ့ အကျင့်စရိုက်ဆိုး အစွန်းအထင်းတွေကို ကိုယ်တိုင် အသိစိတ်နဲ့ အစွန်းချွတ်ကြဖို့ လိုအပ်နေပြီပဲ ဖြစ်ပါတယ်။
