ရက္ခိုင်ကို ပို့ခံရမှာကြောက်လို့ ခလရ ၂၅၂ က တပ်သား ၂ ဦး ထွက်ပြေး အလင်းဝင်

အာရက္ခတိုင်းမ်စ် (၂၄ မေ ၂၀၂၆)

အာရက္ခတပ်တော်နဲ့ တိုက်ပွဲတွေဖြစ်ပွားနေတဲ့ ရက္ခိုင်ပြည်ကို ပို့ခံရမှာကြောက်လို့ ပခုက္ကူအခြေစိုက် ခလရ ၂၅၂ တပ်ရင်းက တပ်သား ၂ ဦး ထွက်ပြေးပြီး Cobra One Pakokku တပ်ဖွဲ့ထံ အလင်းဝင်ရောက်ခဲ့တယ်လို့ သိရပါတယ်။

ရက္ခိုင်ကို အပို့ခံရမှာကြောက်လို့ Cobra One Pakokku တပ်ဖွဲ့ထံ အလင်းဝင်ရောက်ခဲ့သူများမှာ မကွေးတိုင်း၊ ပခုက္ကူမြို့အခြေစိုက် တပ်မ ၁၀၁ လက်အောက်ခံ ခလရ ၂၅၂ တပ်ရင်းက စစ်မှုထမ်းအပတ်စဉ် ၁ တပ်သား ကျော်ဇောထွေးနဲ့ သန္ဓေစစ်သား ကိုယ်ပိုင်အမှတ် တ(၆၀၂၇၄၁) ဝင်းသန့်နိုင် ဖြစ်တယ်လို့ သိရပါတယ်။

“ရက္ခိုင်က ရှေ့တန်းကို အပို့ခံရမှာစိုးလို့ ကြောက်ပြီး ထွက်ပြေးလာတာ၊ စစ်မှုထမ်း အမှတ်စဉ် ၁ က ပထမအသုတ်ကို ရက္ခိုင်ကို ပို့လိုက်ပြီ။ နောက်တသုတ် ထပ်ပို့တော့မှာမလို့ ထွက်ပြေးလာတာ” လို့ Cobra One Pakokku တပ်ဖွဲ့က ဆိုပါတယ်။

စစ်မှုထမ်းတပ်သားများကို ရက္ခိုင်ဘက်ကို ပို့ဆောင်နေရတာကြောင့် တပ်ထဲတွင် အင်အားမရှိတော့တာကြောင့် အပြင်းအထန် ပေါ်တာလိုက်ဆွဲကာ စစ်မှုထမ်း သင်တန်းပို့နေတယ်လို့ သူတို့ ၂ ဦးရဲ့ ထွက်ဆိုချက်အရ သိရှိရတယ်လို့လည်း Cobra One Pakokku တပ်ဖွဲ့က ဆိုပါတယ်။

ထို့ကြောင့် ပြည်သူလူထုအနေနဲ့ သွားလာလှုပ်ရှားရာတွင် အထူးဂရုစိုက်ကြရန်နဲ့ စစ်တပ်ရဲ့ ပေါ်တာဆွဲ ဖမ်းဆီးခံရနိုင်ခြေရှိတဲ့ နေရာတွေကို သတိပြု ရှောင်ရှားနေထိုင်ကြရန် တော်လှန်ရေးအဖွဲ့များက တိုက်တွန်းထားပါတယ်။