ကျောက်ဖြူမြို့ဝင်ဂိတ် ရွေးတုအစိုးရတပ် ပိတ်ဆို့ထားလို့ ဒေသခံပြည်သူတွေ သေဆုံးမှုထိ ရှိနေ

အာရက္ခတိုင်းမ်စ် (၁၁ ဇွန် ၂၀၂၆)

ရက္ခိုင်ပြည် ကျောက်ဖြူမြို့ဝင်ခွင့်ကို ရွေးတုအစိုးရတပ်က ပိတ်ဆို့ထားတဲ့အတွက် ကျန်းမာရေးမကောင်းသူတွေနဲ့ ကျောင်းသူ/ကျောင်းသားတွေဟာ ပညာသင်ကြားခွင့်နဲ့ ကျန်းမာရေးအတွက် ဆေးဝါးကုသမှုတွေ ခံယူနိုင်ဖို့ အခက်အခဲတွေ ရှိနေတာပါ။

ကျောက်ဖြူမြို့အတွင်းမှာ ရှိနေတဲ့ ဒေသခံတွေဟာ အာရက္ခတပ်တော်နဲ့ စစ်ကော်မရှင်တပ်တို့ နှစ်ဖက်တိုက်ပွဲ ဖြစ်ပွားလာချိန်မှာ မြို့တွင်းကနေ ထွက်ခွာပြီးတော့ စစ်ဘေးရှောင်အဖြစ်နဲ့ မဒေးကျွန်းအပါအဝင် တခြားနေရာတွေကို စစ်ဘေးရှောင်ဖို့ ထွက်ခွါ သွားခဲ့ကြရပါတယ်။

လက်ရှိ အဲဒီလို စစ်ဘေးရှောင် ထွက်သွားတဲ့သူတွေဟာ ကလေးတွေရဲ့ ပညာသင်ကြားရေးနဲ့ ကျန်းမာရေးအတွက် လိုအပ်တဲ့ စောင့်ရှောက်မှုတွေ ရနိုင်ဖို့ မြို့တွင်း ပြန်လာချိန်မှာ ပြန်ဝင်ခွင့် မပေးဘဲ ရွေးတုအစိုးရတပ်က မြို့ဝင်ခွင့်ကို ပိတ်ဆို့ထားတာလည်း ဖြစ်ပါတယ်။

ဒီလို ပိတ်ဆို့ထားမှုကြောင့် ကျန်းမာရေး မကောင်းဖြစ်ပြီး ဆေးကုသဖို့ လာသူတချို့ဟာ မြို့ဝင်ခွင့် ရနိုင်ရေးအတွက် လနဲ့ချီ စောင့်ဆိုင်းနေရာကနေ ဆေးကုသမှု မလုပ်လိုက်ရဘဲ အသက်ဆုံးရှုံးမှု ရှိနေတဲ့အထိ ဖြစ်လာနေတာလည်း ဖြစ်ပါတယ်။

စစ်ဘေးရှောင်အရေး ကူညီပေးနေသူတဦးက “မဒေးကျွန်း တခုတည်းမှာဘဲ ပိတ်မိနေတဲ့သူ ၄၀၀ ကျော်လောက် ရှိတယ်။ ကျန်တဲ့ နေရာက လာပြီးတော့ မြို့ဝင်ခွင့်အတွက် စောင့်နေသူတွေလည်း အများကြီး ရှိတယ်။ အဓိကတော့ ထွေအုပ်က ခွင့်မပြုပေးတာ။ကျန်းမာရေး မကောင်းသူတွေကိုလည်း ဝင်ခွင့်မပေးဘူး။ အဲဒီလို မြို့ဝင်ခွင့်စောင့်ရင်း ဆေးမကုလိုက်ရလို့ သေသွားတဲ့သူတွေတောင် ရှိနေတယ်။ တခါတခါ မြို့ဝင်ခွင့်ရဖို့က လနဲ့ချီ စောင့်ရတာ” လို့ အာရက္ခတိုင်းမ်စ်ကို ပြောပါတယ်။

တဖက်မှာလည်း ရွေးတုအစိုးရတပ်အနေနဲ့ အခုလို မြို့ဝင်ခွင့်ကို တင်းတင်းကြပ်ကြပ် ပိတ်ဆို့ထားတာဟာ အာရက္ခတပ်တော်ကို စစ်ရေးအရှုံးနဲ့ ရင်ဆိုင်နေရတဲ့အတွက် ပြည်သူတွေကို အငြိုးအတေးတွေနဲ့ ဖိအားပေး လုပ်ဆောင်နေတာ ဖြစ်တယ်လို့လည်း စစ်ဘေးရှောင်အရေး ကူညီနေသူတွေက သုံးသပ် ပြောဆိုကြပါတယ်။

အဲဒါကြောင့် စစ်ရေးအရှုံး ရင်ဆိုင်ရမှုကို အငြိုးအတေးထားပြီး ပြည်သူကို အငြိုးအတေးနဲ့ လုပ်ဆောင်နေတဲ့ လုပ်ရပ်ကို ရွေးတုအစိုးရတပ်အနေနဲ့ ဖြေလျှော့ ပေးမှု လုပ်ဆောင်ပေးစေချင်တယ်လို့ ဒေသခံတွေက တောင်းဆိုမှုတွေ ရှိနေတာပါ။

လက်ရှိ ဒေသခံပြည်သူတွေ ပိတ်မိနေတဲ့အပေါ် ရွေးတုအစိုးရရဲ့ လွှတ်တော်ကိုယ်စားလှယ်တဦးက “မဒေးကျွန်းမှာ ကျောက်ဖြူမြို့ကို မလာရဘဲ ပိတ်မိနေတဲ့ ကျောင်းသူ/သားတွေ၊ ရောဂါဝေဒနာသည်တွေ၊ ရဟန်းနဲ့ စစ်ဘေးရှောင် ၄၀၀ ကျော်အတွက် ဘယ်သူ့မှာ တာဝန်ရှိနေသလဲ၊ ပြည်နယ်မှာ အစိုးရ မရှိတော့ဘူးလား၊ အုပ်ချုပ်​ရေးယန္တရား အလုံးစုံ ပျက်ယွင်းသွားပြီလား၊ ဘယ်သူ့ကို အဖေခေါ်ရမလဲ၊ ပြည်ထောင်စုကနေ ထုမှ လှုပ်မှာလား” လို့ သူ့ရဲ့ လူမှုကွန်ယက်ကနေ အခုလို ထောက်ပြ ပြောဆိုထားတာကိုလည်း တွေ့ရပါတယ်။

ဒီလို စစ်ရှောင်ပြည်သူတွေကို စစ်တပ်အနေနဲ့ မြို့ဝင်ခွင့် ဘာကြောင့် ပိတ်ဆို့ထားရသလဲ ဆိုတဲ့အပေါ် ရွေးတုအစိုးရရဲ့ ရက္ခိုင်ပြည် ဝန်ကြီးချုပ် ဦးနိုင်ဦးကို ဆက်သွယ်ခဲ့ပေမယ့် ဖုန်းလက်ခံ ဖြေကြားတာ မရှိခဲ့ပါဘူး။

အာရက္ခတပ်တော်နဲ့ ရွေးတုအစိုးရတို့ဟာ ကျောက်ဖြူမြို့နယ်အတွင်းမှာ နှစ်ဖက်တိုက်ပွဲတွေ ဆက်တိုက် ဖြစ်ပွားနေတာဖြစ်ပြီးတော့ ရွေးတုအစိုးရတပ်ဘက်က စစ်ရေးအရှုံးတွေနဲ့ ဆက်တိုက် ရင်ဆိုင်နေရတာလည်း ဖြစ်ပါတယ်။