ဘင်္ဂလားပင်လယ်အော် အနောက်တောင်ပိုင်းမှာ ဆိုင်ကလုန်းမုန်တိုင်းဖြစ်နိုင်ချေ ၉၀ ရာခိုင်နှုန်း မြင့်တက်

အာရက္ခတိုင်းမ်စ် (၁၇ မေ ၂၀၂၅)

ဘင်္ဂလားပင်လယ်အော် အနောက်တောင်ပိုင်းမှာ ဆိုင်ကလုန်းမုန်တိုင်း ဖြစ်နိုင်ချေ ၉၀ ရာခိုင်နှုန်း မြင့်တက်နိုင်တယ်လို့ မိုးလေဝသစောင့်ကြည့်လေ့လာသူ ဦးဝင်းနိုင်က မေလ ၁၇ ရက်မှာ သူ့ရဲ့ လူမူကွန်ရက်စာမျက်နှာမှာ ဖော်ပြထားပါတယ်။

“ အခု မဖြစ်သေးပါဘူး ဖြစ်လာမယ်ဆိုတာလဲ ရာနှုန်းပြည့် မသေချာသေးတာကြောင့် စောင့်ကြည့်ဖို့ လိုပါတယ်” လို့ မိုးလေဝသစောင့်ကြည့်လေ့လာသူ ဦးဝင်းနိုင်က အာရက္ခတိုင်းမ်စ်ကို ပြောပါတယ်။

ဆိုင်ကလုန်းမုန်တိုင်း ဖြစ်နိုင်ချေ ရာခိုင်နှုန်း မြင့်တက်လာခြင်းနဲ့ အတူ မေလ ၁၈ ရက်ကနေ ၂၀ ရက် ၄၈ နာရီအတွင်း ညောင်လေးပင်၊ ဖြူး၊ ဆွာ၊ နေပြည်တော်၊ တပ်ကုန်း၊ ရမည်းသင်း၊ မိတ္ထီလာ၊ သာစည်၊ ရွာငံ၊ ကျောက်ဆည်၊ မန္တလေး၊ တံတားဦး၊ စဉ့်ကူး၊ စစ်ကိုင်း၊ မြင်းမူ၊ ချောင်းဦး၊ မုံရွာ၊ ဘုတလင်၊ ဒီပဲယင်း၊ တန့်ဆည်၊ ခင်ဦး၊ ရွှေဘို၊ ဝက်လက်၊ ကနီ၊ အရာတော်မြို့တွေမှာ မိုးအသင့်အတင့်က‌နေ မိုးများနိုင်ပါတယ်လိုလည်း ရေးသားထားပါတယ်။

ကပ္ပလီပင်လယ်ပြင်နဲ့ ဘင်္ဂလားပင်လယ်အော်တောင်ပိုင်းတို့တွင် လေထုမငြိမ်မသက်မှုများ ဖြစ်ပေါ်လာနိုင်ခြင်းကြောင့် လည်းကောင်း၊ မုတ်သုံလေ ဆက်လက်ဝင်ရောက်လာနိုင်ခြင်းကြောင့်လည်းကောင်း၊ အပူပျံတက်တိမ်များ ဖြစ်ထွန်းမှု အားကောင်းခြင်းကြောင့် လည်းကောင်း မေ ၂၀ရက်က စတင်ပြီး မြန်မာနိုင်ငံ နေရာအနှံ့ မိုးများနိုင်ကြောင်း မိုးလေဝသနှင့်ဇလဗေဒညွှန်ကြားမှု ဦးစီးဌာနက မေ ၁၆ ရက်နေ့မှာ ထုတ်ပြန်ထားပါတယ်။

မိုးများနိုင်တဲ့ ပြည်နယ်နဲ့ မြို့တွေကတော့ နေပြည်တော်၊ ရန်ကုန်၊ မန္တလေး၊ ပဲခူး၊ မကွေး၊ စစ်ကိုင်း၊ ဧရာ၀တီ၊ တနင်္သာရီ၊ ကချင်၊ ကယား၊ ကရင်၊ ချင်း၊ မွန်၊ ရက္ခိုင် နဲ့ ရှမ်းပြည် တို့တွင် နေရာစိပ်စိပ်နဲ့ နေရာအနှံ့အပြား မိုးထစ်ချုန်းရွာနိုင်ပြီး ချင်း၊ မွန် နဲ့ ရှမ်းပြည် တို့တွင် နေရာကွက်ကြား မိုးကြီးနိုင်တယ်လို့လည်း ထုတ်ပြန်ထားပါတယ်။

မိုးရွာသွန်းခြင်းနဲ့ အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်း နဲ့ မြေပြိုခြင်းများကိုလည်း သတိပြုရန် မိုးလေဝသနှင့်ဇလဗေဓညွှန်ကြားမှုဦးစီးဌာနက သတိပေး ထုတ်ပြန်ထားပါတယ်။