စကမရဲ့ လေကြောင်း ရေကြောင်းကနေ လက်နက်ကြီး ပတ်ခတ်တာနဲ့ ပတ်သက်ပြီး AA အရေးပေါ်ထုတ်ပြန်

အာရက္ခတိုင်းမ်စ် (၂၉ စက်တင်ဘာ ၂၀၂၅)

အထိအခိုက် အကျအဆုံးများပြီး တပ်ပျက်နေတဲ့ အကြမ်းဖက်စစ်ကော်မရှင်တပ်က ရက္ခိုင်မှာ လေကြောင်း၊ ရေကြောင်း၊ လက်နက်ကြီးတွေနဲ့ တိုက်ခိုက်မှုတွေ အရင်ကထက် ပိုပြီး လုပ်လာတဲ့အတွက် ဒီတိုက်ခိုက်မှုတွေနဲ့ ပတ်သက်ပြီး အရေးပေါ် ထုတ်ပြန်ချက်ကို အာရက္ခတပ်တော် (AA) ဒီနေ့ စက်တင်ဘာ ၂၉ ရက်နေ့မှာ ထုတ်ပြန်လာပါတယ်။

အကြမ်းဖက် စစ်ကော်မရှင်တပ်ဟာ အာရက္ခတပ်တော် အပြည့်အဝ ထိန်းချုပ်ထားတဲ့ဒေသမှာ တိုက်ပွဲဖြစ်ပွားတာမရှိတဲ့ မြို့ရွာတွေက စာသင်ကျောင်း၊ ဆေးရုံ၊ ဆေးခန်း၊ ဘုန်းကြီးကျောင်းနဲ့ ဈေးတွေအပြင် လူစုလူဝေးရှိနိုင်တဲ့ နေရာတွေကို နေ့ည အချိန်မရွေး လေကြောင်း၊ ရေကြောင်း၊ လက်နက်ကြီးတွေနဲ့ ပစ်ခတ်တာတွေကို ပိုပြီး လုပ်ဆောင်လျက်ရှိနေတာပါ။

ဒါကြောင့် စစ်ကော်မရှင်ရဲ့ လေကြောင်း၊ ရေကြောင်း၊ လက်နက်ကြီးနဲ့ ပတ်သက်ပြီး အာရက္ခပြည်သူတွေအနေနဲ့ အထူးသတိထားကြဖို့ကို အာရက္ခတပ်တော် က ထုတ်ပြန်လာတာ ဖြစ်ပါတယ်။

အာရက္ခဒေသအတွင်းတိုက်ပွဲတွေနဲ့ အာရက္ခဒေသအစပ် (၃) နေရာတွေမှာ ဖြစ်ပွားလျက် ရှိတဲ့ တိုက်ပွဲတွေမှာ အကြမ်းဖက် စစ်ကော်မရှင်တပ်က အထိအခိုက် အကျအဆုံးများစွာနဲ့ ရင်ဆိုင်နေရပြီး တပ်ပျက်လျက်ရှိနေတာ ဖြစ်ပါတယ်။

အဲဒါပြင် သူတို့ အတင်းအဓမ္မ စုဆောင်းထားတဲ့ တပ်ဖွဲ့ဝင်တွေဟာလည်း တိုက်ခိုက်လို စိတ်မရှိဘဲ ရှေ့တန်း၊ နောက်တန်းတွေမှာ အခွင့်ရလျှင်ရသလို တပ်ပြေးတာ၊ AA ထံ ဘက်ပြောင်းတာ၊ အလံဖြူထောင်ဝင်ရောက်တာတွေနေ့တိုင်း ဖြစ်ပျက်လျက်ရှိနေတယ်လို့ အာရက္ခတပ်တော်က ထုတ်ပြန်ထားပါတယ်။