အာရက္ခတိုင်းမ်စ် (၂၇ ဇန်နဝါရီ ၂၀၂၆)
ရက္ခိုင်ပြည်၊ ပုဏ္ဏားကျွန်းမြို့နယ်ရှိ အများပြည်သူ အင်တာနက်သုံးစွဲတဲ့နေရာကို ဗုံးကြဲတိုက်ခိုက်မှုအပေါ် ပုဏ္ဏားကျွန်းလူငယ်များအစည်းအရုံးက ရှုံ့ချ ပြောဆိုခဲ့ပါတယ်။
ပုဏ္ဏားကျွန်းမြို့နယ်၊ ပက်ခွက်ဆိပ်ရပ်ရွာ အနီးရှိ အများပြည်သူ အင်တာနက်သုံးစွဲတဲ့ နေရာကို ဒီကနေ့ ဇန်နဝါရီလ ၂၇ ရက်၊ နံနက် ၁ နာရီ ၂၀ မိနစ် ကျော်တွင် စစ်ကော်မရှင်ရဲ့လေတပ်က ဂျက်ဖိုက်တာ အသုံးပြုပြီး ပေါင် ၅၀၀ ဗုံးတလုံးနဲ့ ပေါင် ၃၀၀ ဗုံး နှစ်လုံး စုစုပေါင်း ဗုံး သုံးလုံး ကြဲချခဲ့တာလည်း ဖြစ်ပါတယ်။
“နိုင်ငံရပ်ခြားမှာ ရှိနေတဲ့ သား/သမီးများ ၊ ခင်ပွန်းများ ၊ မိဘများနဲ့ အဆက်အသွယ်ရစေရန် ၊ နိုင်ငံရပ်ခြားကနေ ငွေလွှဲ ငွေထုတ် ပြုလုပ်ရန် အာရက္ခပြည်သူများအတွက် အာရက္ခပြည်သူ့တော်လှန်ရေးအစိုးရက ဖွင့်လှစ်ပေးထားတဲ့ ပြည်သူ့ဝန်ဆောင်မှုနေရာကို ဦးတည်ထားတိုက်ခိုက်မှုဟာ အလွန်ရွံစရာကောင်းသော လုပ်ရပ်” လို့ ပုဏ္ဏားကျွန်းလူငယ်များအစည်းအရုံးက ဆိုပါတယ်။
အပြစ်မရှိတဲ့ ပြည်သူလူထုကို သတ်ဖြတ်ခြင်း ၊ ပြည်သူလူထုနဲ့ ဆက်စပ်တဲ့ နေရာတွေကို ဖျက်စီးခြင်းအပေါ် ပုဏ္ဏားကျွန်းလူငယ်များအစည်းအရုံးက ပြင်းပြင်းထန်ထန် ကန့်ကွက် ရှုံ့ချတယ်လို့လည်း ထုတ်ပြန်ချက်မှာ ဖော်ပြထားပါတယ်။
Photo – One Nation News
212 comments