အာရက္ခတိုင်းမ်စ် (၃ မတ်လ ၂၀၂၆)
ရက္ခိုင်ပြည်၊ ပုဏ္ဏားကျွန်းမြို့နယ်၊ ယိုးငူရွာဖြစ်စဉ်မှာ သေဆုံးသူ ၁၉ ဦးထိ ရှိလာနေပြီး အရေးပေါ်လူနာတချို့ စိုးရိမ်ရတယ်လို့ ကူညီဆောင်ရွက်ပေးနေတဲ့ စာရေးဆရာဝေဟင်အောင်က ပြောပါတယ်။
ပြီးခဲ့တဲ့ ဖေဖော်ဝါရီလ ၂၈ ရက်မှာ အသက် ၇ နှစ် အရွယ်ရှိ မအေးငြိမ်းသွယ် ထပ်မံသေဆုံးခဲ့တာကြောင့် လက်ရှိအချိန်အထိ သေဆုံးသူဦးရေဟာ ကျား/မ စုစုပေါင်း ၁၉ ဦး ရှိပြီလို့ သိရပါတယ်။
“ အရေးပေါ်လူနာထဲမှာလည်း နည်းနည်း စိုးရိမ်ရတဲ့ လူတွေ ရှိနေသေးတယ်ဗျ။ ဆေးရုံမှာ” လို့ စာရေးဆရာဝေဟင်အောင်က အာရက္ခတိုင်းမ်စ်ကို ပြောပါတယ်။
အပြစ်မဲ့ပြည်သူ ကျား/မ စုစုပေါင်း ၁၈ ဦး သေဆုံးခဲ့သလို အသက် ၇ နှစ် အရွယ်ကနေ အသက် ၆၀ အရွယ်ရှိ ကျား/မ စုစုပေါင်း ၁၅ ဦး ထိခိုက် ဒဏ်ရာရရှိခဲ့တယ်လို့ အာရက္ခတပ်တော် AA က ဖေဖော်ဝါရီလ ၂၅ ရက်မှာ ကနဦး ထုတ်ပြန်ခဲ့ပါတယ်။
လက်ရှိအချိန်မှာတော့ မြေပြင်စာရင်းတွေအရ ဒဏ်ရာရရှိသူ ၂၇ ဦးထိရှိပြီး အရေးပေါ်လူနာအဖြစ် ဆေးကုသနေသူ ၈ ဦး ရှိတယ်လို့ စာရေးဆရာဝေဟင်အောင်က ဆိုပါတယ်။
