အာရက္ခတိုင်းမ်စ် (၇ မေ ၂၀၂၆)
အာရက္ခတပ်တော်ရဲ့ စစ်ဦးစီးချုပ် ဗိုလ်ချုပ်ထွန်းမြတ်နိုင်ဟာ စာဖတ်အားအကောင်းဆုံးနဲ့ အတက်ကြွဆုံး တော်လှန်ရေးခေါင်းဆောင်လို့ The Diplomat သတင်းဌာနရဲ့ အကြီးတန်း သတင်းထောက် Rajeev Bhattacharyya က ဆိုပါတယ်။
“ အခုအချိန်ထိ မိမိ တွေ့ဖူးသမျှ တော်လှန်ရေးခေါင်းဆောင်တွေထဲမှာ စာဖတ်အားအကောင်းဆုံးနဲ့ အတက်ကြွဆုံး တော်လှန်ရေးခေါင်းဆောင်ပဲ” လို့ Rajeev Bhattacharyya က ဆိုပါတယ်။
အဆိုပါ မှတ်ချက်ကို Rajeev Bhattacharyya နဲ့ ဗိုလ်ချုပ် ထွန်းမြတ်နိုင်တို့ ပြုလုပ်ခဲ့တဲ့ အင်တာဗျူးကို နိုင်ငံတကာသတင်းဌာနဖြစ်တဲ့ The Diplomat တွင် ဖော်ပြအပြီးမှာ Rajeev Bhattacharyya က သူ့ရဲ့ လူမှုကွန်ရက်စာမျက်နှာမှာ ရေးသားထားတာလည်း ဖြစ်ပါတယ်။
Rajeev Bhattacharyya က ဗိုလ်ချုပ် ထွန်းမြတ်နိုင်ဟာ အလုပ်များပြားတာနဲ့ လုံခြုံရေးအခြေအနေများကြားကနေ တွေ့ဆုံခွင့်ပေးခဲ့တဲ့အတွက် ကျေးဇူးတင်ကြောင်း ပြောကြားခဲ့ပြီး၊ သူရေးသားထားတဲ့ ULFA စာအုပ်ကိုလည်း လက်ဆောင်အဖြစ် ပေးအပ်ခဲ့ သိရပါတယ်။
ULFA (United Liberation Front of Assam) စာအုပ်ဟာ ၁၉၇၉ ခုနှစ်တွင် တည်ထောင်ထားတဲ့ အိန္ဒိယနိုင်ငံ အရှေ့မြောက်ပိုင်း Assam ပြည်နယ်အခြေစိုက် လက်နက်ကိုင်အဖွဲ့တခုဖြစ်ပြီး၊ Assam ကို သီးခြားလွတ်လပ်ရေး ရရှိစေရန် ရည်ရွယ်လှုပ်ရှားနေတဲ့ အဖွဲ့ဖြစ်ပြီး လက်ရှိတွင် အဖွဲ့အတွင်း ညှိနှိုင်းရေးလိုလားတဲ့ အဖွဲ့နဲ့ လက်နက်ကိုင်လမ်းကြောင်း ဆက်လက်သွားမယ် အဖွဲ့ဆိုပြီး ကွဲပြားမှုတွေ ရှိနေတယ်လို့လည်း သိရပါတယ်။
အဆိုပါ စာအုပ်ထဲတွင် ULFA ရဲ့ သမိုင်းကြောင်း၊ လှုပ်ရှားမှုများနဲ့ ဒေသတွင်း ဆက်နွယ်မှုများကို အသေးစိတ် သုံးသပ်ရေးဖွဲ့ထားတာကြောင့် စစ်ရေးနဲ့နိုင်ငံရေးကို နားလည်ချင်သူတွေအတွက် အရေးပါတဲ့ စာအုပ်ကောင်း တအုပ်ဖြစ်တယ်လို့လည်း သိရပါတယ်။
