ရက္ခိုင်မှာ အိမ်ဆောက်ပစ္စည်း ဈေးတက်၊ ကုန်စည်ဈေးနှုန်း ကျ

အာရက္ခတိုင်းမ်စ် (၁၈ ဧပြီ ၂၀၂၅)

ရက္ခိုင်ပြည်က အာရက္ခတပ်တော် ထိန်းချုပ်ထားတဲ့ နယ်မြေတွေမှာ အိမ်ဆောက်ပစ္စည်းတွေ ဈေးနှုန်းမြင့်တက်တာတွေ ဖြစ်ပေါ်နေတယ်လို့ ဒေသခံတွေက အာရက္ခတိုင်းမ်စ်ကို ပြောပါတယ်။

သယ်ယူပို့ဆောင်ရေး လမ်းကြောင်းတလျှောက် စစ်ကောင်စီတပ်နဲ့ တော်လှန်ရေးအင်အားစုတို့ တိုက်ပွဲ ပြန်လည်ဖြစ်ပွားနေတာ၊ ငလျင်လှုပ်ခတ်မှုကြောင့် လမ်းပိုင်းတွေ ပျက်စီးသွားတဲ့အတွက်ကြောင့်လည်း ကုန်စည်စီးဆင်းမှု ခက်ခဲပြီး ကုန်ကျစရိတ်တွေ မြင့်တက်မှု ဖြစ်ပေါ်ခဲ့တယ်လို့ သိရပါတယ်။

အာရက္ခတပ်တော် ထိန်းချုပ်ထားတဲ့ ရက္ခိုင်ပြည်က မြို့နယ်တော်တော်များမှာ အိမ်ဆောက်ပစ္စည်းတွေက ဈေးနှုန်းမြင့်တက်လာနေပေမယ့် အမ်းမြို့နယ်မှာတော့ သိသိသာသာ မြင့်တက်လာတာ မရှိသေးဘူးလို့ အမ်းမြို့ဒေသခံတစ်ယောက်က အာရက္ခတိုင်းမ်စ်ကို ပြောပါတယ်။

“ အခု ဈေးနှုန်းကတော့ အမ်းမြို့နယ်ထဲမှာတော့ ကုန်ဈေးနှုန်းကတော့ ဈေးသိသိသာသာ မြင့်တက်လာတာမျိုးတော့ အခုချိန်ထိ မတွေ့ရသေးဘူး။ ဈေးကတော့ တဖြည်းဖြည်း လျော့ကျလာတာမျိုး တွေ့ပါတယ်။ တစ်ဖက်မှာတော့ ကုန်ပစ္စည်းသယ်တဲ့ လမ်းကြောင်းတလျှောက်မှာ ပြည်သူ့ကာကွယ်ရေးတပ်ဖွဲ့နဲ့ စစ်ကောင်စီတို့ တိုက်ပွဲဖြစ်လာတဲ့အခါမှာ ပစ္စည်းတွေက အလွယ်တကူ မရောက်တာလည်း ရှိတယ်။ နောက်တစ်ခု ငလျင်လှုပ်ပြီးနောက်ပိုင်းမှာလည်း လမ်းတွေက ပျက်စီးလာတဲ့အခါမှာ ပိုပြီး ကုန်ကျစရိတ်တွေ များလာတယ်။ ကုန်ပစ္စည်းတွေ အများကြီး ဈေးတက်လာတဲ့ အနေအထားမှာ တွေ့ရတယ်။ ဒါပေမယ့် အမ်းမြို့နယ်မှာတော့ ကုန်ပစ္စည်းတွေ အများကြီး ဈေးထိုးတက်လာတာတော့ ကျနော်တို့ မတွေ့ရသေးဘူး” လို့ ပြောပါတယ်။

အာရက္ခတပ်တော်နဲ့ ရက္ခိုင်ပြည် နယ်စပ်မှာရှိတဲ့ တော်လှန်ရေးအင်အားစုတွေ ပူးပေါင်းပြီး ကုန်စည်စီးဆင်းမှု လွယ်ကူဖို့ လုပ်ဆောင်နေတာရှိတဲ့အတွက် အမ်းမြို့နယ်အပါအဝင် ရက္ခိုင်က အာရက္ခတပ်တော် ထိန်းချုပ်ထားတဲ့ မြို့နယ်တွေမှာ အာရက္ခတပ်တော် ထိန်းချုပ်ပြီးနောက်ပိုင်းကာလတွေမှာ ကုန်ဈေးနှုန်းတွေက တဖြည်းဖြည်း လျော့ကျလာနေတာကို တွေ့ရပါတယ်။

လက်ရှိမှာလည်း ကုန်စည်သယ်ဆောင်တဲ့လမ်းကြောင်း အခက်အခဲကြောင့် အာရက္ခတပ်တော် ထိန်းချုပ်ထားတဲ့ မြို့တချို့မှာ ကုန်ဈေးနှုန်း မြင့်တက်တာနဲ့ ကြုံနေရပေမယ့်လည်း အမ်းမြို့နယ်မှာတော့ ဈေးနှုန်း လျော့နည်းနေတယ်လို့ အမ်းမြို့ဒေသခံတစ်ယောက်က ပြောပါတယ်။

“ စစ်ကောင်စီက ကန့်သတ်ထားတဲ့ ပစ္စည်းတွေပေါ့နော်။ ခက်ခက်ခဲခဲနဲ့ သယ်ယူပို့ဆောင်ရတဲ့အခါကျတော့ ကုန်ကျစရိတ်တွေက များတယ်ပေါ့နော်။ ကုန်သည်တွေကလည်း ကုန်ကျစရိတ်တွေ များလာတဲ့အခါမှာ ပြည်သူတွေကို ရောင်းချတဲ့အခါမှာ ကုန်ဈေးနှုန်းက မြင့်သွားတဲ့အနေအထားမှာ ရှိနေတယ်ပေါ့နော်။ ဆေးဝါးပစ္စည်းတွေတို့၊ ဘိလပ်မြေ၊ ဆောက်လုပ်ရေးနဲ့ ပတ်သက်တဲ့ ပစ္စည်းတွေပေါ့နော်။ နောက်ပြီးတော့ သံမှုန့်တွေ၊ မူလီတွေပေါ့။ အဲဒီပစ္စည်းတွေကတော့ ဈေးမြင့်တက်တာမျိုး ရှိနေသေးတယ်ပေါ့။ လူသုံးကုန်၊ စားသုံးကုန်ကတော့ တောက်လျှောက် ဈေးနည်းနေတယ်ပေါ့” လို့ ပြောပါတယ်။

ရက္ခိုင်ပြည်က အာရက္ခတပ်တော် ထိန်းချုပ်ထားတဲ့ တချို့မြို့နယ်တွေရဲ့ ကုန်ဈေးနှုန်းက စစ်ကောင်စီ ထိန်းချုပ်ထားတဲ့ မြို့နယ်တွေဖြစ်တဲ့ စစ်တွေနဲ့ ကျောက်ဖြူတို့ထက် ဈေးနှုန်းသက်သာနေပါသေးတယ်လို့ သိရပါတယ်။

အမ်းမြို့နယ်ဆိုရင် အရင် စစ်ကောင်စီက ကုန်စည်သယ်ဆောင်ခွင့် ကန့်သတ်ထားတဲ့ အချိန်ကာလနဲ့ နှိုင်းယှဉ်ရင် အာရက္ခတပ်တော် ထိန်းချုပ်ပြီးနောက်ပိုင်းမှာ ကုန်ဈေးနှုန်းက ထက်ဝက်ခန့် လျော့ကျသွားတယ်လို့ အမ်းမြို့ဒေသခံတွေထံကနေ သိရပါတယ်။