စစ်တွေနဲ့ ပုဏ္ဏားကျွန်းအစပ်မှာ စကမက ဒရုန်းဗုံးကြဲမှုတွေ ပိုလုပ်လာနေ

အာရက္ခတိုင်းမ်စ် (၃ ဇန်နဝါရီ ၂၀၂၆)

ရက္ခိုင်ပြည် စစ်တွေမြို့နဲ့ ပုဏ္ဏားကျွန်းမြို့အစပ်မှာ စစ်ကော်မရှင်က လေကြောင်းကနေ ဒရုန်းဗုံးကြဲမှု ပိုလုပ်လာနေတယ်လို့ စစ်တွေဒေသခံတွေက အာရက္ခတိုင်းမ်စ်ကို ပြောပါတယ်။

အရင်က စစ်ကော်မရှင်ဟာ ပုဏ္ဏားကျွန်းဘက်ကို လေကြောင်းကနေ လေယာဉ်နဲ့ ဗုံးကြဲလေ့ရှိပေမယ့် အခုရက်ပိုင်းမှာတော့ ဒရုန်းတွေနဲ့ပဲ ဗုံးကြဲတာတွေ လုပ်နေတာ ဖြစ်ပါတယ်။

အဲဒီလို လုပ်တဲ့အခါမှာ အာရက္ခတပ်တော် က ဒရုန်းတွေကို စက်သေနတ်တွေနဲ့ ပစ်ချဖို့ ပြန်လည်ပစ်ခတ်တာကြောင့် စစ်တွေမြို့ကနေ ညအချိန်တွေမှာ စက်သေနတ်သံတွေ ကြားလာနေရတယ်လို့ စစ်တွေဒေသခံတွေက ပြောပါတယ်။

“ ပုဏ္ဏားကျွန်း အမြင့်ကျွန်းနားက နေရာဆိုလို့ရှိရင် ဒရုန်းတွေနဲ့ လာပစ်တယ်လို့ ပြောတယ်။ လေယာဉ်နဲ့ မဟုတ်တော့ဘူး။ အခု ဒရုန်းနဲ့ လာပစ်တာ။ သတိထားနေရတယ်။ အရင်က လေယာဉ်နဲ့ပစ်တာ အခုက စစ်တွေနဲ့ နီးတဲ့နေရာကျတော့ ဒရုန်းတွေနဲ့ ပစ်တာ။ အဲဒီဒရုန်းတွေနဲ့ ပစ်တော့ AA က လက်နက်တွေနဲ့ ပြန်ပစ်တာ အဲဒီလိုဖြစ်တာ” လို့ အာရက္ခတိုင်းမ်စ်ကို ပြောပါတယ်။

အရင်က စစ်ကော်မရှင်နဲ့ အာရက္ခတပ်တော် တို့ဟာ စစ်တွေနဲ့ ပုဏ္ဏားကျွန်းအစပ်နေရာတွေမှာပဲ ပစ်ခတ်မှုတွေ ရှိနေပြီး ပစ်ခတ်သံတွေ​ ကြားနေရပေမယ့် ပြီးခဲ့တဲ့ ရက်ပိုင်းမှာတော့ စစ်တွေမြို့နဲ့ နီးတဲ့ အာဂျိတ်တော်ကုန်းနဲ့ ၁၂ တပ်ရင်းတွေဘက်ကနေ လက်နက်သံတွေကို ကြားနေရတယ်လို့ စစ်တွေဒေသခံတယောက်က ပြောပါတယ်။

“ အာဂျိတ်တော်ကုန်းဆို အန်တီတို့နဲ့ နီးနီးလေးလေ။ ၁၂ တပ်ရင်းလည်း နီးတယ်။ မြို့ထဲတော့ မဟုတ်ဘူး။ အန်တီတို့ဘက်ကနေ သွားရင်တော့ နီးတယ်။ နှစ်ဖက်ဖြစ်တယ်လို့ ပြောတယ်။ မနေ့က တညလုံးပဲ။ ဖြစ်တယ်ဆိုတာက နီးတော့နီးနေပြီပေါ့” လို့ အာရက္ခတိုင်းမ်စ်ကို ပြောပါတယ်။

စစ်ကော်မရှင်ဟာ အာရက္ခတပ်တော် ထိန်းချုပ်ထားတဲ့ စစ်တွေမြို့ပြင်၊ ပုဏ္ဏားကျွန်းနဲ့ ရသေ့တောင်ဘက်တွေကို လေ​ကြောင်းကနေ လက်နက်ကြီးတွေ ဒရုန်းတွေနဲ့ ပစ်ခတ်လေ့ရှိပါတယ်။

ဒါ့ကြောင့် လက်ရှိမှာ စစ်ကော်မရှင်နဲ့ အာရက္ခတပ်တော် တို့ဟာ စစ်တွေမြို့ပြင်နဲ့ ပုဏ္ဏားကျွန်းဘက်မှာ လက်နက်ကြီးတွေ၊ ဒရုန်းတွေနဲ့ အပြန်အလှန် ပစ်ခတ်မှုတွေ ဖြစ်ပေါ်နေတာ ဖြစ်ပါတယ်။