AA နဲ့ ပူးပေါင်းမဟာမိတ်တပ်တွေ စစ်ကိုင်းမှာ စစ်ယာဉ်တန်းကို တိုက်ခိုက်၊ လက်နက်ခဲယမ်းများ ရရှိ

အာရက္ခတိုင်းမ်စ် (၁၂ မေ ၂၀၂၆)

စစ်ကိုင်းတိုင်း ထီးချိုင့်မြို့ကနေ ထွက်ခွာလာတဲ့ စစ်ယာဉ်တန်းကို လမ်းခုလတ်တနေရာတွင် အာရက္ခတပ်တော်နဲ့ ပူးပေါင်းမဟာမိတ်တပ်တွေ ကြားဖြတ်တိုက်ခိုက်ခဲ့လို့ စစ်ကော်မရှင်တပ်သားအချို့ သေဆုံးခဲ့ပြီး လက်နက်ခဲယမ်းများ သိမ်းဆည်းရရှိခဲ့တယ်လို့ သိရပါတယ်။

“ စကမရဲ့ စစ်ကြောင်းက ၁၀ ရက်နေ့မှာ ထီးချိုင့်ကနေ ကသာကို စထွက်လာတာ။ လမ်းခုလတ်မှာ AA နဲ့ အဖွဲ့က ကြားဖြတ် တိုက်ခိုက်ခဲ့တယ်။ တိုက်ပွဲက တော်တော်လေး ပြင်းထန်ခဲ့ပြီး စကမဘက်က နှစ်ယောက် ပွဲချင်းပြီး သေတယ်။ ဒဏ်ရာရသွားသူတွေလည်း များတယ်” လို့ မြေပြင်စစ်ရေးသတင်းရင်းမြစ်တဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင်ရဲ့ စစ်ကြောင်းဟာ မေလ ၈ ရက်က စစ်ကိုင်းတိုင်း ထီးချိုင့်မြို့ကို ရောက်ရှိနေပြီး မေလ ၁၀ ရက်မှာတော့ ကသာမြို့ကို ထွက်ခွာလာစဉ် နေ့လည် ၂ နာရီခွဲခန့်မှာ AA၊ KIA၊ PDF စတဲ့ မဟာမိတ်ပူးပေါင်းတပ်တွေက အလစ်အငိုက် ဝင်ရောက်စီးနင်း တိုက်ခိုက်ခဲ့တာလည်း ဖြစ်ပါတယ်။

အဆိုပါ တိုက်ခိုက်မှုကြောင့် စစ်ဘက်သုံးယာဉ် ၃ စီး၊ ဆိုင်ကယ် ၁ စီးနဲ့ သေနတ် ၇ လက်တို့ကို သိမ်းဆည်းရခဲ့တယ်လို့လည်း သိရပါတယ်။

မတ်လ ၂၉ ရက်တွင် KIA နဲ့ PDF များ ထိန်းချုပ်ထားတဲ့ ကသာမြို့ စစ်ကော်မရှင်က ပြန်လည်သိမ်းပိုက်ခဲ့ပြီး ဧပြီလ ၃၀ ရက်တွင်လည်း အင်းတော်မြို့ကို ထပ်မံ ထိန်းချုပ်ခဲ့ပါတယ်။

လက်ရှိမှာ အဆိုပါနယ်မြေများကို တော်လှန်ရေးတပ်များ ပြန်လည်စိုးမိုးနိုင်ရန် AA နဲ့ ပူးပေါင်းမဟာမိတ်တပ်များက ပြောက်ကျား စစ်ဆင်ရေးနဲ့ တိုက်ခိုက်နေလို့ စစ်ကိုင်းအထက်ပိုင်းတွင် စစ်ရေးအရှိန် မြင့်တက်နေတယ်လို့ သိရပါတယ်။