ရွှေရိုးရာ KTV ဆိုင်ပိုင်ရှင်ကို လူကုန်ကူးမှုနဲ့ ဒီလပ် အရေးယူဆောင်ရွက်နေ

အာရက္ခတိုင်းမ်စ် (၅ ဇွန် ၂၀၂၆)

ရက္ခိုင်ပြည် မြောက်ဦးမြို့ ထမ္မရာဇ်ရပ်ကွက်တွင် ဖွင့်လှစ်ထားတဲ့ ရွှေရိုးရာ KTV ဆိုင်ပိုင်ရှင် အပါအဝင် တာဝန်ရှိသူတွေကို လူကုန်ကူးမှုနဲ့ ဖမ်းဆီး အရေးယူဆောင်ရွက်နေတယ်လို့ ဒီလပ်ဌာနက ဆိုပါတယ်။

ရွှေရိုးရာ KTV ဆိုင်ဟာ KTV လုပ်ငန်း အကြောင်းပြပြီး ပြည့်တန်ဆာလုပ်ငန်း လုပ်ကိုင်ခြင်းနဲ့ ရရှိလာတဲ့ ငွေကြေးတွေကို ခေါင်းပုံဖြတ် အမြတ်ထုတ်ခြင်းတို့ကြောင့် လူကုန်ကူးမှု တားဆီးနှိမ်နင်းရေးဥပဒေ ပုဒ်မ ၃၅ နဲ့ ဖမ်းဆီး အရေးယူ ဆောင်ရွက်နေတယ်လို့ သိရပါတယ်။

ဖမ်းဆီး အရေးယူ ခံထားရသူများမှာ KTV ဆိုင်ပိုင်ရှင် အသက် ၅၆ နှစ်အရွယ် ဒေါ်ခင်မိုးမိုးဝင်း၊ မန်နေဂျာဖြစ်သူ အသက် ၄၅ နှစ်အရွယ် ဒေါ်လှလှဝင်းနဲ့ ဒု-မန်နေဂျာဖြစ်သူ အသက် ၄၂ နှစ်အရွယ် ဒေါ်ပြည့်ပြည့်ဝင်းတို့ ဖြစ်တယ်လို့လည်း အာရက္ခမှုခင်းနှင့် ဆက်စပ်သတင်းများထုတ်ပြန်ရေးအဖွဲ့က ထုတ်ပြန်ပါတယ်။

ပြည့်တန်ဆာလုပ်ငန်း လုပ်ကိုင်နေတယ်လို့ တိုင်တန်းချက်အရ ဒီလပ်ဌာနက မေလ ၂၄ ရက်တွင် ရွှေရိုးရာ KTV ဆိုင်ကို ဝင်ရောက်စီးနင်း ရှာဖွေ ဖမ်းဆီးခဲ့ပြီး ဝင်ရောက် ရှာဖွေချိန်တွင် လူကုန်ကူးမှု ကျူးလွန်သူ ၃ ဦးနဲ့အတူ အတင်းအဓမ္မ စေခိုင်းခံထားရတဲ့ အမျိုးသမီး ၁၀ ဦး၊ လာရောက် ပျော်ပါးသူ အမျိုးသားတချို့နဲ့ ပြည့်တန်ဆာလုပ်ငန်းတွင် အသုံးပြုတဲ့ သက်သေခံ ပစ္စည်းတွေကိုပါ တွဲဖက် ဖမ်းဆီးရမိခဲ့တယ်လို့လည်း သိရပါတယ်။

ဖမ်းဆီးထားတဲ့ အမျိုးသမီး ၃ ဦးကို ဥပဒေအရ တရားစွဲဆိုသွားမှာဖြစ်ပြီး လူကုန်ကူးမှု တားဆီးနှိမ်နင်းရေး ဥပဒေပုဒ်မ ၃၅ အရ ပြစ်မှုထင်ရှားပါက အနည်းဆုံး ထောင်ဒဏ် ၁၀ နှစ်ကနေ အများဆုံး ထောင်ဒဏ်တသက်အထိ ကျခံရမယ့်အပြင် ငွေဒဏ်လည်း ချမှတ်ခံရနိုင်တယ်လို့ အာရက္ခမှုခင်းနှင့် ဆက်စပ်သတင်းများထုတ်ပြန်ရေးအဖွဲ့က ထုတ်ပြန်ပါတယ်။