ပွိုင့် ၂၂၇ က ထွက်ပြေးတဲ့ တပ်သားအလောင်းနဲ့ လက်နက်ခဲယမ်း AA ထပ်မံ ရရှိ

by Rakhita Timesဇူလိုင် 7, 2026ဇူလိုင် 7, 2026127 472

အာရက္ခတိုင်းမ်စ် (၇ ဇူလိုင် ၂၀၂၆)

ဧရာဝတီတိုင်း ရေကြည်မြို့နယ်ရှိ ရွေးတုအစိုးရတပ်ရဲ့ ပွိုင့် ၂၂၇ ကုန်းက ကာကင်းစခန်း ၂ ခုကို အာရက္ခတပ်တော်က ဇူလိုင်လ ၂ ရက်နဲ့ ၃ ရက်မှာ သိမ်းပိုက်ရရှိခဲ့ပါတယ်။

ပွိင့် (၂၂၇) ကုန်းက ထွက်ပြေးနေတဲ့ တပ်မ (၆၆) လက်အောက်ခံ ခမရ (၁၀၈) တပ်ရင်းက တပ်သားတွေကို လိုက်လံ ချေမှုန်းနေတယ်လို့လည်း အာရက္ခတပ်တော်ကထုတ်ခဲ့ပြီးနောက် ဇူလိုင်လ ၇ ရက်မှာ ရန်သူ့လက်နက်ခဲယမ်းအချို့၊ စစ်အသုံးအဆောင်ပစ္စည်းအချို့နဲ့ ရန်သူ့အလောင်းအချို့တို့ကို ထပ်မံ သိမ်းဆည်းရရှိခဲ့တယ်လို့ အာရက္ခတပ်တော်က ထုတ်ပြန်ပါတယ်။

အာရက္ခတပ်တော်က “ဖက်ဆစ် အကြမ်းဖက် စစ်ကော်မရှင်တပ်ဟာ မိမိတို့ သိမ်းပိုက်ထားတဲ့ ကုန်းများနဲ့ တိုက်ပွဲ ဖြစ်ပွားရာ နေရာတွေကို ဂျက်ဖိုက်တာတွေနဲ့ အကြိမ်ကြိမ် လာရောက် တိုက်ခိုက်ခြင်း၊ ဒရုန်းများနဲ့ တိုက်ခိုက်ခြင်း၊ အဝေးက လက်နက်ကြီးများနဲ့ ပစ်ခတ်မှုများကို ဆက်တိုက် ပြုလုပ်နေတယ်” လို့လည်း ထုတ်ပြန်ချက်မှာ ပါရှိပါတယ်။

စစ်ရေးအရ ရှုံးနိမ့်နေတဲ့ ရွေးတုအစိုးရတပ်ဟာ ဇူလိုင်လ ၅ ရက်က ရေကြည်မြို့နယ်တွင် အာရက္ခတပ်တော် ရှိနိုင်တယ်လို့ ထင်တဲ့နေရာတွေကို လက်နက်ကြီးနဲ့ ပစ်ခတ်တိုက်ခိုက်လို့ ဒေသခံပြည်သူ ၂ ဦး သေဆုံးခဲ့ပြီး ၃ ဦး ထိခိုက်ဒဏ်ရာ ရရှိခဲ့ပါတယ်။

၂၀၂၆ ခုနှစ် ဇူလိုင်လ ၂ ရက်တွင် ဧရာဝတီတိုင်း ရေကြည်မြို့နယ်ရှိ ရွေးတုအစိုးရတပ်ရဲ့ ၂၂၇ ပွိုင့်ကုန်း အနောက်ဘက် ၁.၁ ကီလိုမီတာခန့်အကွာတွင် တပ်စွဲထားတဲ့ ပထမ ကာကင်းကုန်းနေရာနဲ့ ၂၀၂၆ ခုနှစ် ဇူလိုင်လ ၃ ရက်တွင် ၂၂၇ ပွိုင့်ကုန်းကနေ ၁ ကီလိုမီတာခန့် အကွာအဝေးရှိ ဒုတိယ ကာကင်းကုန်း (တာဝါတိုင်စခန်းကုန်း) တို့ကို အာရက္ခတပ်တော်က သိမ်းပိုက်အပြီးမှာ ယခုလို ရွေးတုအစိုးရတပ်က လက်နက်ကြီးတွေနဲ့ ပြည်သူတွေကို ရည်ရွယ်ချက်ရှိရှိ ပစ်ခတ် တိုက်ခိုက်နေတာလည်း ဖြစ်ပါတယ်။