အာရက္ခတိုင်းမ်စ် (၄ ဒီဇင်ဘာ ၂၀၂၅)
အာရက္ခတပ်တော်က ရက္ခိုင်ပြည် ပြင်ပဖြစ်တဲ့ ဧရာဝတီတိုင်းက မြို့နယ် ၄ မြို့နယ်တွင် ထိုးစစ်ဆင်နေတယ်လို့ သိရပါတယ်။
“AA က ဧရာဝတီမှာဆိုရင် လေးမျက်နှာ၊ သာပေါင်း၊ ရေကြည် နဲ့ ငါးသိုင်းချောင်းမြို့နယ်တွေမှာ ထိုးစစ်ဆင်နေလို့ နှစ်ဖက်တိုက်ပွဲတွေ ပြင်းထန်နေတယ်” လို့ စစ်ရေးလေ့လာသုံးသပ်သူတဦးက အာရက္ခတိုင်းမ်စ်ကို ပြောပါတယ်။
ဧရာဝတီတိုင်း လေးမျက်နှာမြို့နယ်တွင် ဒီဇင်ဘာလ ၁ ရက်က စတင်ကာ တိုက်ပွဲတွေ ပြင်းထန်နေပြီး စစ်ကော်မရှင်ဖက်က လေကြောင်းကနေ ဗုံးကြဲတိုက်ခိုက်နေတာကြောင့် လေးမျက်နှာမြို့နယ်ရှိ ကျေးရွာတွေက ပြည်သူတွေဟာ စစ်ဘေးရှောင်နေကြရတယ်လို့လည်း သိရပါတယ်။
“ရွာတွေကရော မြို့ပေါ်ကပါ တော်တော်များများ စစ်ရှောင်သွားကြပြီ။ မြို့ပေါ်မှာလည်း ခြောက်ကပ်နေပြီ။ မသွားနိုင်တဲ့ သူတွေလောက်ပဲ ကျန်တော့တယ်။ ကျနော်တို့ကတော့ နေလို့ရသလောက်တော့ ဆက်နေမှာပါ။ သွားမယ် လာမယ်ဆို ပိုက်ဆံလိုတယ်လေ” လို့ လေးမျက်နှာမြို့ဒေသခံတဦးက အာရက္ခတိုင်းမ်စ်ကို ပြောပါတယ်။
အလားတူ အာရက္ခတပ်တော်က ငါးသိုင်းချောင်းမြို့နယ်က စစ်ကော်မရှင်ရဲ့ အမြောက်တပ်ဖြစ်တဲ့ အမတ (၃၄၄) ကိုလည်း ၀ိုင်း၀န်းပိတ်ဆို့ ထားတယ်လို့ သိရပါတယ်။
ISP Myanmar ရဲ့ အစီရင်ခံစာမှာလည်း အာရက္ခတပ်တော် နဲ့ ပူးပေါင်းတပ်တွေဟာ ရက္ခိုင်ပြည်နဲ့ ထိစပ်နေတဲ့ မကွေး၊ ပဲခူး၊ ဧရာဝတီတိုင်း စတဲ့ တိုင်းဒေသကြီးတွေမှာ စစ်မျက်နှာ ချဲ့ထွင်နေပြီး ပဲခူးတိုင်း ဥသျှစ်ပင်မြို့ရှိ ကာကွယ်ရေးပစ္စည်းစက်ရုံ (ကပစ) အမှတ်-၆ နဲ့ မကွေးတိုင်း ပဒါန်းမြို့ရှိ ကပစ-၁၄ တို့ကိုလည်း ထပ်မံ ဦးတည်နေတယ်လို့ ဖော်ပြထားပါတယ်။ အစီရင်ခံစာအရ မကွေးတိုင်း ပဒါန်းမြို့ရဲ့ ၁၇ မိုင် ဝန်းကျင်ကို AA နဲ့ ပူးပေါင်းတပ်များရဲ့ထိုးစစ် ရောက်ရှိနေတယ်လို့ သိရပါတယ်။
129 comments