စစ်တွေက စစ်ရှောင် ၁၅၀၀ အတွက် ၁ ဦးလျင် ငွေ ၅ သောင်း ကြက်ခြေနီအသင်းထောက်ပံ့

အာရက္ခတိုင်းမ်စ် (၂၄ မေ ၂၀၂၆)

ရက္ခိုင်ပြည် စစ်တွေမြို့ပေါ်ရှိ စစ်ရှောင်စခန်းက စစ်ရှောင်ပြည်သူ ၁၅၀၀ အတွက် ၁ ဦးလျင် ငွေကျပ် ၅ သောင်းစီ ကူညီထောက်ပံ့ပေးခဲ့တယ်လို့ သိရပါတယ်။

“ငွေသားထောက်ပံ့ရာမှာ ဘုန်းတော်ကြီးကျောင်းများတွင် ယာယီနေရပ်စွန့်ခွာ ရွှေ့ပြောင်းနေထိုင်နေတဲ့ အိမ်ထောင်စုပေါင်း ၄၅၆ စုက လူဦးရေ စုစုပေါင်း ၁၅၀၀ ဦး အတွက် တဦးလျှင် ငွေကျပ် ၅၀၀၀၀ နှုန်းနဲ့ စုစုပေါင်း ငွေကျပ် ၇၅၀၀၀၀၀၀ ကို ထောက်ပံ့ကူညီခဲ့ပါတယ်” လို့ မြန်မာနိုင်ငံကြက်ခြေနီအသင်းက ဆိုပါတယ်။

အဆိုပါကဲ့သို့ ငွေသားထောက်ပံ့နိုင်ရန်အတွက် အသင်းဝန်ထမ်းများနဲ့ ကြက်ခြေနီ စေတနာလုပ်အားရှင်များဟာ မေလ ၁၂ ရက်ကနေ မေလ ၁၄ ရက်အထိ အဆိုပါ နေရာတွေကို သွားရောက်ပြီး ကနဦး လေ့လာဆန်းစစ်ခြင်းများကို ဆောင်ရွက်ခဲ့ပြီး သတ်မှတ်ချက်နဲ့အညီ ပံ့ပိုးကူညီနိုင်ရန် စနစ်တကျ ဆောင်ရွက်ခဲ့တယ်လို့လည်း သိရပါတယ်။

စစ်တွေမြို့ရှိ စစ်ရှောင်စခန်းက စစ်ရှောင်ပြည်သူတွေကို မြန်မာနိုင်ငံကြက်ခြေနီအသင်းအနေနဲ့ မေလ ၁၉ ရက်ကနေ မေလ ၂၁ အတွင်း သွားရောက် ကူညီထောက်ပံ့ပေးခဲ့တာလည်း ဖြစ်ပါတယ်။

မြန်မာနိုင်ငံကြက်ခြေနီအသင်းအနေနဲ့ အဆိုပါ ငွေသားထောက်ပံ့ခြင်း အစီအစဉ်ကို မိတ်ဖက် ကြက်ခြေနီအသင်းများရဲ့ ပံ့ပိုးကူညီမှုနဲ့ ဆောင်ရွက်ခဲ့ခြင်းဖြစ်ပြီး ဆက်လက် ပံ့ပိုးကူညီနိုင်ရန် ဆောင်ရွက်နေတယ်လို့လည်း သိရပါတယ်။