Category : News

အာရက္ခတိုင်းမ်စ် (၂၅ ဖေဖော်ဝါရီ ၂၀၂၆) ရက္ခိုင်ပြည် ပုဏ္ဏားကျွန်းမြို့နယ် ယိုးငူရွာ ဗုံးကြဲခံရမှုတွင် သေဆုံးသူဦးရေ ၁၈ ဦး အထိ ရှိလာနေတယ်လို့ သိရပါတယ်။ ပုဏ္ဏားကျွန်းမြို့နယ်၊ ယိုးငူရွာဈေးနဲ့ တာဝါတိုင်အနီးကို စစ်ကော်မရှင်က ဗုံးကြဲတိုက်ခိုက်လို့ အသက် ၆ နှစ်အရွယ်ကလေးငယ်တဦး အပါအဝင် အပြစ်မဲ့အရပ်သားပြည်သူ ၁၇ ဦး သေဆုံးခဲ့တယ်လို့ အာရက္ခတပ်တော်က ထုတ်ပြန်ခဲ့ပါတယ်။ ဖေဖော်ဝါရီလ ၂၄ ရက် နေ့လည် ၂ နာရီခန့်က စစ်ကော်မရှင်ရဲ့ ဂျက်ဖိုက်တာနဲ့ ရက္ခိုင်ပြည် ပုဏ္ဏားကျွန်းမြို့နယ် ယိုးငူရွာကို ပေါင် (၃၀၀) ဗုံး နှစ်လုံး ကြဲချတိုက်ခိုက်ခဲ့တာလည်း ဖြစ်ပါတယ်။ ဒီကနေ့ ဖေဖော်ဝါရီလ ၂၅ ရက် နံနက်ပိုင်းတွင် စစ်ကော်မရှင်ရဲ့ လေကြောင်းတိုက်ခိုက်မှုကြောင့် ဒဏ်ရာပြင်းထန်ရရှိထားသူတွေထဲက တဦး ထပ်မံသေဆုံးသွားလို့ သေဆုံးသူ ၁၈ ဦး အထိ ရှိလာနေတာလည်း ဖြစ်ပါတယ်။ စစ်ကော်မရှင်ရဲ့ ပေါင်း ၃၀၀ ဗုံး ၂ လုံး ကြဲချတိုက်ခိုက်မှုကြောင့် သေဆုံးခဲ့ရသူ အများစုမှာ အမျိုးသမီးတွေဖြစ်တယ်လို့လည်း သိရပါတယ်။ စစ်ကော်မရှင်က ယိုးငူရွာကို ဗုံးကြဲတိုက်ခိုက်ခဲ့လို့ နေအိမ်နဲ့ စျေးဆိုင်အများအပြားလည်း မီးလောင်ပျက်စီးခဲ့ရပါတယ်။ အဆိုပါ ယိုးငူရွာဟာ စစ်ဘေးရှောင် အများအပြား နေထိုင်နေကြတဲ့ ရွာတရွာဖြစ်တယ်လို့လည်း ဒေသခံတွေက ဆိုပါတယ်။...

အာရက္ခတိုင်းမ်စ် (၂၅ ဖေဖော်ဝါရီ ၂၀၂၆) စစ်ကော်မရှင်ဟာ နိုင်ငံတကာရာဇဝတ်မှုနဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှုကို ပြောင်ပြောင်တင်းတင်း ကျူးလွန်နေပြီး ဗြောင်ကျကျ ချိုးဖောက်နေတယ်လို့ HDCO က ထုတ်ပြန်ပါတယ်။ “ စစ်ရေးနဲ့ လုံးဝသက်ဆိုင်ခြင်းမရှိတဲ့ ကျေးရွာများအတွင်းကို နေ့ခင်းကြောင်တောင် ဗုံးကြဲတိုက်ခိုက်ခြင်းဟာ နိုင်ငံတကာစစ်ရာဇဝတ်မှု (War Crimes) နဲ့ လူသားမျိုးနွယ်အပေါ် ကျူးလွန်တဲ့ ရာဇဝတ်မှု (Crimes against Humanity) ကို ပြောင်ပြောင်တင်းတင်း ကျူးလွန်ခြင်း ဖြစ်တယ်။ ဒီလုပ်ရပ်ဟာ ဂျီနီဗာကွန်ဗင်းရှင်း (Geneva Conventions) ပါ အရပ်သားများကို ကာကွယ်စောင့်ရှောက်ရမယ့် အခြေခံမူများကို ဗြောင်ကျကျ ချိုးဖောက်ခြင်းပင် ဖြစ်တယ်”  လို့ လူသားချင်းစာနာထောက်ထားရေးနဲ့ ဖွံဖြိုးရေးဆိုင်ရာ ပူးပေါင်းဆောင်ရွက်ရေးရုံး (HDCO) က ဆိုပါတယ်။ ဖေဖော်ဝါရီလ ၂၄ ရက် နေ့လယ် (၂) နာရီ (၇) မိနစ် အချိန်ခန့်တွင် မြန်မာအကြမ်းဖက်စစ်ကော်မရှင်ရဲ့ လေတပ်ဟာ ရက္ခိုင်ပြည်၊ ပုဏ္ဏားကျွန်းမြို့နယ် ရှိ ယိုးငူကျေးရွာအတွင်းရှိ ဈေးဆိုင်တန်းကို ဂျက်ဖိုက်တာ (Jet Fighter) အသုံးပြုပြီး တမင်သက်သက် ပစ်မှတ်ထားကာ လေကြောင်းက ဗုံးကြဲတိုက်ခိုက်မှု ကျူးလွန်ခဲ့ပါတယ်လို့ သိရပါတယ်။ အရပ်သားပြည်သူများကို ပစ်မှတ်ထား တိုက်ခိုက်မှုကြောင့် အပြစ်မဲ့အရပ်သား ပြည်သူ (၁၇) ဦးခန့် ပွဲချင်းပြီး သေဆုံးခဲ့ရပြီး (၁၄) ဦးခန့် ထိခိုက်ဒဏ်ရာ ရရှိခဲ့ပြီး အပြစ်မဲ့ကလေးငယ်များနဲ့ သက်ကြီးရွယ်အိုများ ပါဝင်ပြီး ပြည်သူပိုင်နေအိမ်များနဲ့ ဈေးဆိုင် အချို့လည်း ပျက်စီးဆုံးရှုံးခဲ့ရတယ်လို့ HDCO က ဆိုပါတယ်။ လူသားချင်းစာနာထောက်ထားရေးနဲ့ ဖွံဖြိုးရေးဆိုင်ရာ ပူးပေါင်းဆောင်ရွက်ရေးရုံး (HDCO) အနေနဲ့ မြန်မာစစ်ကော်မရှင်ရဲ့ အခုလို အပြစ်မဲ့ပြည်သူများအပေါ် ကျူးလွန်တဲ့ ရက်စက်ကြမ်းကြုတ်တဲ့ အကြမ်းဖက်လုပ်ရပ်ကို အပြင်းအထန် ကန့်ကွက်ရှုတ်ချပါတယ်လို့လည်း ဆိုပါတယ်။ မိမိတိ့်အနေနဲ့ ထိခိုက်၊ သေဆုံးသွားရတဲ့ မိသားစုဝင်များနဲ့အတူ ထပ်တူထပ်မျှ ဝမ်းနည်းကြေကွဲရပါကြောင်းနဲ့ လိုအပ်တဲ့ ကူညီထောက်ပံ့မှုများကို အခြားသက်ဆိုင်ရာ အာရက္ခဌာနများနဲ့ ပူးပေါင်းပြီး အမြန်ဆုံး စီမံဆောင်ရွက်လျက်ရှိပါတယ်လို့လည်း HDCO က ဆိုပါတယ်။  နိုင်ငံတကာ အသိုက်အဝန်းအနေနဲ့လည်း စစ်ကော်မရှင်ရဲ့ အခုလို အကြမ်းဖက်လုပ်ရပ်များကို ဟန့်တားနိုင်ရန် ထိရောက်စွာ အရေးယူဆောင်ရွက်ပေးပါရန် အလေးအနက်ထား တောင်းဆိုအပ်ပါတယ်လို့ HDCO က တိုက်တွန်းထားပါတယ်။...

အာရက္ခတိုင်းမ်စ် (၂၄ ဖေဖော်ဝါရီ ၂၀၂၆) ရက္ခိုင်ပြည် ပုဏ္ဏားကျွန်းမြို့နယ် ယိုးငူရွာကို စစ်ကော်မရှင်က ဒီကနေ့ နေ့လည် ၂ နာရီခန့်က ဗုံးကြဲချခဲ့လို့ ယိုးငူကျေးရွာစျေးမီးလောင်ခဲ့ပြီး အရပ်သားပြည်သူ ၁၂ ဦး သေဆုံးခဲ့ပြီး ၂၀ ဦးထပ်မနည်း ထိခိုက်ဒဏ်ရာ ရရှိခဲ့တယ်လို့ ကနဦး သိရပါတယ်။ အသေးစိတ်ကို ဆက်လက်သတင်း တင်ဆက်ပေးပါမယ်။...

အာရက္ခတိုင်းမ်စ် (၂၄ ဖေဖော်ဝါရီ ၂၀၂၆) ရက္ခိုင်ပြည် စစ်တွေမြို့ လူတွေသေဆုံးကြတဲ့အခါ နာရေးအဖြစ် အလောင်းကို ရက်ပိုင်းလောက် အိမ်မှာထားတတ်ကြလေ့ရှိပေမယ့် အခုအခါမှာတော့ စစ်တပ်ရဲ့ရန်ကိုကြောက်တဲ့အတွက် မထားကြတော့ဘူးလို့ ဒေသခံတဦးက အာရက္ခတိုင်းမ်စ်ကို ပြောပါတယ်။ “ရပ်ကွက်မှာ တခါတလေ နာရေးဖြစ်လို့ အခုက နာရေးဆိုရင် ည တညထားတဲ့ နာရေးက သိပ်မရှိတော့ဘူး။ အချိန်မမီမှ နာရေးကို ညထားတာပါ။ ည မထားတာက လူစုလူဝေးနဲ့ ရှိနေဖို့ကို စစ်တပ်က လာစစ်မှာကို ကြောက်လို့၊ အဖမ်းခံရမှာကို ကြောက်လို့ ည မထားတာပါ။ အချိန်မမီဆိုရင်တော့ ညသိပ်ပြီးမှ နောက်တရက်နေ့မှ သဂြိုလ်ပါတယ်လေ။ ဒီမှာက မီးလည်းမရတဲ့အခါ အသုဘ ချတယ်ဆိုတာက ရေခဲအခေါင်းနဲ့ ထားရတာလေ။ ရေခဲမရရင် မီးစက်ဖိုး မတတ်နိုင်၊ ဆီဖိုး မတတ်နိုင်လို့ အကြာကြီး မထားတာလည်း ရှိပါတယ်။ လူစုလူဝေး မလုပ်ရ၊ လူစုလူဝေး မလုပ်ဝံ့လို့” လို့ သူက ပြောပါတယ်။ လက်ရှိအခြေအနေအရ စစ်တွေမြို့မှာ ညမထွက်ရအမိန့် (ပုဒ်မ ၁၄၄) ရှိနေဆဲဖြစ်သလို လုံခြုံရေးအရလည်း အထူးတင်းကျပ်ထားဆဲ ဖြစ်ပါတယ်။ ည ၉ နာရီကနေ မနက် ၄ နာရီအထိ သတ်မှတ်ထားပြီး စစ်ရေးအခြေအနေပေါ် မူတည်ပြီး ဒေသန္တရအာဏာပိုင်တွေက အချိန်မရွေး ပြောင်းလဲ သတ်မှတ်နိုင်ပါတယ်။ အသုဘကိစ္စမျိုးတွေအတွက် ညဘက် သွားလာဖို့ လိုအပ်လာရင်တောင် ဒီအမိန့်ကြောင့် အခက်အခဲရှိနိုင်ပြီး ဒေသခံ အုပ်ချုပ်ရေးပိုင်းကို ကြိုတင်အကြောင်းကြားတာ ဒါမှမဟုတ် လူစုလူဝေး မလုပ်ဘဲ နေအိမ်မှာပဲ တိတ်တိတ်ဆိတ်ဆိတ်နေကြရတဲ့ အခြေအနေမျိုး ရှိကြောင်းလည်း သိရပါတယ်။ လက်ရှိမှာတော့ စစ်ကော်မရှင်ခန့် ပြည်နယ်အစိုးရတို့ဟာ စစ်တွေမြို့ လမ်းမထက်တွေနဲ့ ရပ်ကွက်လမ်းကြားတွေမှာ လုံခြုံရေးစောင့်ကြည့်ကင်မရာ CCTV တွေကို ဆိုလာစနစ်နဲ့ တပ်ဆင်နေတယ်လို့ သိရပါတယ်။...

အာရက္ခတိုင်းမ်စ် (၂၄ ဖေဖော်ဝါရီ ၂၀၂၆) ရက္ခိုင်ပြည် ပုဏ္ဏားကျွန်းမြို့နယ်ကို စစ်ကော်မရှင်က ဒီကနေ့နေ့လည်က ဗုံးကြဲချခဲ့လို့ ယိုးငူကျေးရွာစျေးမီးလောင်နေပြီး အရပ်သားပြည်သူ ထိခိုက် သေဆုံးမှုတွေ ရှိတယ်လို့ သိရပါတယ်။ အသေးစိတ်ကို ဆက်လက်သတင်း တင်ဆက်ပေးပါမယ်။...

အာရက္ခတိုင်းမ်စ် (၂၄ ဖေဖော်ဝါရီ ၂၀၂၆) ပလက်ဝမြို့နယ်၊ တွီကင်းဝရွာတွင် ဖေဖော်ဝါရီလ ၂၁ ရက် နေ့လည်က မီးလောင်မှုဖြစ်ပွားခဲ့လို့ နေအိမ် ၁၀ လုံး ပျက်စီးသွားတယ်လို့ သိရပါတယ်။ ဖေဖော်ဝါရီလ ၂၁ ရက် နေ့လည် ၃ နာရီခန့်တွင် ပလက်ဝမြို့နယ်၊ တွီကင်းဝရွာနေ ဦးကျော်သာဦးက အိမ်တွင် ရေနွေးကြိုရာကနေ ဘေးက ဝါးထံရံကို မီးလောင်ရာကနေ ကူးစက်သွားတာဖြစ်တယ်လို့ ဒေသခံတွေက ဆိုပါတယ်။ “ နေ့ခင်း နေ့လည်ဖြစ်တော့ လေကလည်း မငြိမ်ဘူးလေ။ ရွာကသူတွေ ကူညီပြီး ငြိမ်းသတ်ကြတာပဲ၊ ဒါပေမယ့် မီးအရှိန်ကို လျော့အောင်ပဲ လုပ်နိုင်တာ။ မီးသတ်ကားလာမှပဲ အကုန် ငြိမ်းသွားတာ”  လို့ ပလက်ဝမြို့နယ်ဒေသခံတဦးက အာရက္ခတိုင်းမ်စ်ကို ပြောပါတယ်။ အဆိုပါ မီးလောင်မှုကို အာရက္ခပြည်သူ့တော်လှန်ရီးအစိုးရ မီးသတ်ဌာနနဲ့ ရွာသူ ရွာသားများ ဝိုင်းဝန်းကူညီ ငြိမ်းသတ်မှုကြောင့် ညနေ ၅ နာရီခန့်မှာ မီးငြိမ်းသွားတယ်လို့ သိရပါတယ်။ မီးလောင်မှုနဲ့ပတ်သက်ပြီး မီးစလောင်ခဲ့တဲ့ အိမ်ရှင်ဖြစ်သူ ဦးကျော်သာဦးကို တရားဥပဒေစိုးမိုးရီးနဲ့ ပြည်သူ့လုံခြုံရီးဌာန (DLEPS) က ဥပဒေလုပ်ထုံးလုပ်နည်းနဲ့အညီ အရေးယူ ဆောင်ရွက်နေတယ်လို့လည်း သိရပါတယ်။...

အာရက္ခတိုင်းမ်စ် (၂၄ ‎ဖေဖော်ဝါရီ ၂၀၂၆) ‎‎ဧရာဝတီတိုင်း ရေကြည်မြို့နယ် ဂွ- ငသိုင်းချောင်းလမ်း မြောက်စမ်းရွာအနီးရှိ အမြောက်တပ် အမတ ၃၄၄ အနီး အာရက္ခတပ်တော် ပူးပေါင်းမဟာမိတ်တပ်နဲ့ စစ်ကော်မရှင်တို့ တိုက်ပွဲပြင်းထန်နေတယ်လို့ သိရပါတယ်။ အဆိုပါ အမြောက်တပ် အမတ ၃၄၄ ကို အာရက္ခတပ်တော်နဲ့ ပူးပေါင်းမဟာမိတ်တပ်တွေဟာ ဖေဖော်ဝါရီလ ၁၈ ရက်ကစတင်ကာ ပြန်လည်ထိုးစစ်ဆင် တိုက်ခိုက်နေတယ်လို့လည်း သိရပါတယ်။ ‎အမြောက်တပ် အမတ ၃၄၄ ကို ကျုံပျော် ခလရ ၃၆ က အင်အားတချို့ စစ်ကူပို့ထားပြီး ဒဏ်ရာရရှိသူများကို စစ်ကော်မရှင်က ကားနဲ့ သယ်ထုတ်ပေးနေတယ်လို့လည်း သိရပါတယ်။ ရှေ့တန်းစစ်မြေပြင်ကို ပို့ဆောင်ခံထားရတဲ့ စစ်ကော်မရှင်ရဲ့ စစ်မှုထမ်းတပ်သားတွေဟာ စစ်ရေးအတွေ့အကြုံ မရှိတဲ့အတွက် ထွက်ပြေးတာတွေလည်း ဆက်တိုက်ရှိနေတယ်လို့ သိရပါတယ်။ ‎အမြောက်တပ် အမတ ၃၄၄ နဲ့ နယ်မြေဆက်စပ်နေတဲ့ လေးမျက်နှာမြို့နယ်အတွင်းရှိ စက်စက်ယို၊ ချင်းလယ် စတဲ့ကျေးရွာတွေကလည်း ပစ်ခတ်သံတွေ ကြားနေရတယ်လို့ ဒေသခံတွေက ဆိုပါတယ်။ ‎သီတာကုန်းပြင်ရှိ တော်လှန်ရေးတပ်များရဲ့ ခြေကုတ်စခန်းတခုကို ဝင်ရောက်တိုက်ခိုက်ခဲ့တဲ့ စစ်ကော်မရှင်စစ်ကြောင်းဟာ တိုက်စစ်အသွင်ဆောင်တဲ့ ခံစစ်အနေအထား ပြန်လည်ရောက်ရှိနေတယ်လို့လည်း CDM ဗိုလ်ကြီးဇင်ယော်က သုံးသပ်ထားပါတယ်။...

အာရက္ခတိုင်းမ်စ် (၂၃ ဖေဖော်ဝါရီ ၂၀၂၆) စစ်ကော်မရှင် ထိန်းချုပ်ထားတဲ့ ရက္ခိုင်ပြည်၊ စစ်တွေမြို့ပြင်မှာ စစ်ကော်မရှင်တပ်နဲ့ အာရက္ခတပ်တော်တို့ အပြန်အလှန် ပစ်ခတ်မှုတွေ ဖြစ်ပေါ်နေပြီး တိုက်ပွဲ ပြင်းထန်နေတယ်လို့ စစ်တွေမြို့ဒေသခံတွေက အာရက္ခတိုင်းမ်စ်ကို ပြောပါတယ်။ စစ်ကော်မရှင်နဲ့ အာရက္ခတပ်တော်တို့ဟာ စစ်တွေမြို့ပြင်မှာ နေ့စဉ်နဲ့အမျှ အပြန်အလှန် ပစ်ခတ်မှုတွေ ရှိနေပေမယ့်လည်း...

အာရက္ခတိုင်းမ်စ် (၂၃ ဖေဖော်ဝါရီ ၂၀၂၆) အာရက္ခတပ်တော်အနေနဲ့ ရက္ခိုင်ပြည်မှာ သိမ်းပိုက်ဖို့ ကျန်ရှိတဲ့ မြို့ ၃ မြို့ကို သိမ်းနိုင်တဲ့ အနေအထား ရှိပေမယ့် မသိမ်းသေးတာဟာ တရုတ်ရဲ့ သဘောထားနဲ့လည်း ဆိုင်တယ်လို့ နိုင်ငံရေးလေ့လာသုံးသပ်သူတဦးက အာရက္ခတိုင်းမ်စ်ကို ပြောပါတယ်။ “AA ကတော့ သူတို့ပြည်နယ်ထဲက လက်ကျန် ၃ မြို့က ဆက်သိမ်းရမလား၊ မသိမ်းရဘူးလား အဲဒီဟာတော့ တရုတ်ရဲ့ သဘောထားနဲ့လည်း ဆိုင်တယ်။ တကယ်တမ်းက သိမ်းမယ်ဆို သူတို့ သိမ်းနိုင်တဲ့ အနေအထား ရှိတယ်။ မူဆယ်တို့ ဘာတို့ ချန်ထားသလိုမျိုး။ မူဆယ်တို့ ဘာတို့တုန်းက ချန်ထားတာက တရုတ်က မသိမ်းနဲ့ဆိုလို့ ချန်ထားတာလေ။ လားရှိုးတောင် သူတို့ သိမ်းနိုင်သေးတာပဲ။ အဲဒီတော့ ရက္ခိုင်ကလည်း အဲဒီ ၃ မြို့က သိမ်းမှာလား၊ မသိမ်းဘူးလား ဆိုတာက တရုတ်ရဲ့ သဘောထားနဲ့လည်း ဆိုင်တယ်။ ဒီအစိုးရသစ်ဖွဲ့ခြင်း၊ မဖွဲ့ခြင်းနဲ့ မဆိုင်ဘူး” လို့ သူက ပြောပါတယ်။ လက်ရှိမှာ အာရက္ခတပ်တော်ဟာ ရက္ခိုင်ပြည်က စစ်တွေ၊ ကျောက်ဖြူနဲ့ မာန်အောင် ၃ မြို့ကလွဲပြီး ကျန်မြို့အားလုံးကို သိမ်းပိုက် အုပ်ချုပ်ထားနိုင်နေသလို စစ်ကော်မရှင်ကလည်း အဲဒီ ကျန် ၃ မြို့မှာ ရွေးကောက်ပွဲ ကျင်းပခဲ့ပြီး လွှတ်တော်အမတ်တွေ ရွေးချယ်ထားပါတယ်။ ရက္ခိုင်ဒေသကိုတော့ စစ်ကော်မရှင်ဟာ အချိန်အခါမရွေး လေကြောင်းနဲ့ ဗုံးကြဲတိုက်ခိုက်မှုတွေကို လုပ်ဆောင်ခဲ့ပြီး အာရက္ခတပ်တော် (AA) ထိန်းချုပ်ထားတဲ့ ရက္ခိုင်က မြို့နယ်တွေမှာ စစ်ကော်မရှင်ရဲ့ လေကြောင်းနဲ့ လက်နက်ကြီး ပစ်ခတ်တိုက်ခိုက်မှုတွေကြောင့် ၂ ပတ်အတွင်းမှာ ဒေသခံပြည်သူ ၁၁ ယောက် သေဆုံးပြီး ၂၈ ယောက် ပြင်းထန်ဒဏ်ရာ ရရှိခဲ့တယ်လို့ သိရပါတယ်။ တရုတ်ဟာ သူ့အကျိုးစီးပွားဖြစ်တဲ့ အိန္ဒိယသမုဒ္ဒရာ ထွက်ပေါက်လမ်းကြောင်းကို အာမခံချက်ရှိပြီး ဩဇာလွှမ်းမိုးစေရေး၊ အနောက်အုပ်စုနဲ့ မရင်းနှီးစေရေးကို လိုလားတာကြောင့် စစ်ကော်မရှင်နဲ့ ကြံ့ဖွံ့ရဲ့ လက်ထဲမှာပဲ အာဏာကို ရစေချင်တာဖြစ်တယ်လို့ နိုင်ငံရေးလေ့လာသုံးသပ်သူတဦးက အာရက္ခတိုင်းမ်စ်ကို ပြောပါတယ်။ “တရုတ်ရဲ့ သဘောထားက ဒီနေရာတွေကို သိမ်းပိုက်ထားတဲ့၊ ထိန်းချုပ်ထားတဲ့ အင်အားစုတွေက သူတို့ရဲ့ ဩဇာခံဖြစ်တယ်ဆိုရင် နောင်အနာဂတ်မှာ အိန္ဒိယသမုဒ္ဒရာ ထွက်ပေါက်လမ်းကြောင်းက အာမခံချက် ရှိတယ်ဆိုတဲ့ အမြင်နဲ့ သူက ဒီလမ်းကြောကို ဩဇာအာဏာ လွှမ်းမိုးအောင် လုပ်လာပါမယ်။ ဒါပေမယ့် ဒီလိုအနေအထားအရ ပြည်ခိုင်ဖြိုးပါတီ ဒါမှမဟုတ် တပ်မတော်ပေါ့။ တပ်နဲ့ ပြည်ခိုင်ဖြိုးပါတီရဲ့ လက်ထဲမှာပဲ သူက ရှိစေချင်တယ်။ ဒါမှသာလျှင် သူက အနောက်အုပ်စု အထူးသဖြင့် အမေရိကန်နဲ့ မရင်းနှီးအောင်ပေါ့လေ။ မရင်းနှီးတဲ့ ဆက်ဆံရေးရှိနေမှာ ဖြစ်ပြီးတော့ သူနဲ့ပိုပြီးတော့ ပလဲနံ ပနံသင့် မှာပေါ့။ NLD တို့ ဘာတို့ တခြား ဒီမိုကရေစီ အင်အားစုတွေ အာဏာရလာရင်တော့ ဗဟိုက အာဏာလည်း သူ့အတွက်က မသေချာဘူးပေါ့။ အစိုးရ အပြောင်းအလဲကလည်း ရွေးကောက်ပွဲနဲ့ အပြောင်းအလဲ ဖြစ်နိုင်တာပေါ့။ ဒါကြောင့် သူက အပေါ်ပိုင်းမှာ အဲဒီလို တပ်ရဲ့ ဟိုဟာနဲ့ အာဏာရနေတဲ့ ဥစ္စာကို ပြုတ်မသွားစေဘူး။ အဲဒီအပေါ်မှာ သူက ဘာပြောမလဲ သူ့နိုင်ငံအကျိုးစီးပွားတွေနဲ့ ပေါင်းစပ်ပြီး ကူညီတာ၊ ဖိအားပေးတာ အဲဒါတွေ လုပ်တာပေါ့” လို့ သူက ပြောပါတယ်။ စစ်တပ်က ရက္ခိုင်မှာ လက်လွှတ်ဆုံးရှုံးသွားတဲ့ မြို့နယ်တွေမှာ စစ်ဘေးရှောင်စခန်း၊ စာသင်ကျောင်း၊ ဆေးရုံ၊ လူနေအိမ်နဲ့ ဘာသာရေး အဆောက်အအုံတွေကိုပါမကျန် လေကြောင်းကနေ ပစ်မှတ်ထား တိုက်ခိုက်မှုတွေ ဆက်တိုက် ပြုလုပ်နေပါတယ်။ ဒါကြောင့် အစုလိုက်အပြုံလိုက် ထိခိုက်သေဆုံးမှုတွေလည်း ပိုများလာနေပြီး ဒေသခံပြည်သူတွေအနေနဲ့ လေကြောင်းရန်အန္တရာယ်ကို အမြဲသတိထားပြီး စစ်ရေးသတိရှိစွာ နေထိုင်ကြဖို့ AA ဘက်ကလည်း တိုက်တွန်း ပြောဆိုထားပါတယ်။...

အာရက္ခတိုင်းမ်စ် (၂၃ ဖေဖော်ဝါရီ ၂၀၂၆) ရက္ခိုင်ပြည် လွတ်မြောက်နယ်မြေက ပြည်သူတွေ လုံခြုံရေးအတွက် DLEPS ဝန်ထမ်း ၂၀၀၀ ကျော် ထပ်မံ လိုအပ်နေတယ်လို့ သိရပါတယ်။ “ ရက္ခိုင်ပြည် တပြည်လုံးအတွက် DLEPS အရေအတွက် ၅ ထောင်ကျော်လောက်လိုတယ်။ အခုက ၂၈၀၀ လောက်သာ ရှိပါသေးတယ်”  လို့ အာရက္ခတပ်တော် ဗိုလ်မှူးထွန်းမင်းနိုင်က သူ့ရဲ့ လူမှုကွန်ရက် စာမျက်နှာမှာ ရေးသားထားပါတယ်။ DLEPS အင်အား နည်းပါးနေတာကြောင့် အာရက္ခပြည်သူ့တော်လှန်ရေးအစိုးရအနေ နဲ့ DLEPS တပ်ဖွဲ့ မရှိတဲ့ နေရာတချို့က ပြဿနာတွေကို ဖြေရှင်းတဲ့နေရာတွေ အခက်အခဲတွေ ရှိနေတယ်လို့လည်း သိရပါတယ်။ “ DLEPS မလုံလောက်တဲ့အချိန်မှာ ဝေးလံခေါင်ဖျားက ရွာတွေမှာ ပြဿနာတက်ရင် အုပ်ချုပ်ရေးကို တိုင်ရပါတယ်။ အုပ်ချုပ်ရေးအနေနဲ့ အဲဒီရွာနားမှာ DLEPS စခန်း မရှိသေးတဲ့အခါ အရက်သောက် ရမ်းကားတဲ့သူကို ထိန်းဖို့ တော်တော်ခက်ပါတယ်”  လို့ ဗိုလ်မှူးထွန်းမင်းနိုင်က ဆက်လက်ရေးသားထားပါတယ်။ အဆိုပါ အခက်အခဲကို ဖြေရှင်းရန်အတွက် ဆက်သွယ်ရေးလိုင်းဖွင့်ပေးရန်ကိုလည်း စစ်ကော်မရှင်ရဲ့ လေကြောင်းရန်ကြောင့် လုံခြုံရေးကို ထည့်စဉ်းစားနေရတယ်လို့လည်း သိရပါတယ်။ ရက္ခိုင်ပြည်ရှိ လွတ်မြောက်နယ်မြေများတွင် အာရက္ခတပ်တော်က ရဲ ဆိုတဲ့ အသုံးအနှုန်းအစား ဒီလပ် (DLEPS) လို့ ပြောင်းလဲထားပြီး အဆိုပါ ဒီလပ် (DLEPS) ရဲ့ စာလုံးအရှည်ဟာ Department of Law Enforcement and Public Security ဖြစ်ပြီး အာရက္ခပြည်သူ့လုံခြုံရေးနှင့် တရားဥပဒေစိုးမိုးရေးဌာန ဖြစ်ပါတယ်။...