အာရက္ခတိုင်းမ်စ် (၂၃ – အောက်တိုဘာ -၂၀၂၄)
စစ်ကောင်စီ နဲ့ ARSA ၊ RSO၊ ARA တို့လို အစွန်းရောက်တပ်ဖွဲ့တွေ ပူးပေါင်းပြီး အာရက္ခတပ်တော်ကို တိုက်ခိုက်တာတွေ လုပ်ဆောင်ခဲ့တယ်လို့ အာရက္ခတပ်တော် (AA) က အောက်တိုဘာလ ၂၂ ရက် က သတင်းထုတ်ပြန်ခဲ့ပါတယ်။
မောင်တောမြို့မှာ စစ်ကောင်စီရဲ့ နခခ(၅) စခန်းတစ်ခုဘဲ ကျန်နေပြီဆိုပေမယ့် မိမိတို့ လက်လှမ်းမမီသေးတဲ့ တောထူထပ်တဲ့ တောင်တန်းဒေသတွေမှာ ARSA, RSO, ARA တပ်ဖွဲ့တွေဟာ အခိုင်အမာ စခန်းချပြီး ခိုအောင်းနေကြပြီး ပြည်သူတွေကို ဖမ်းဆီးခြိမ်းခြောက်၊ ပြန်ပေးဆွဲ၊ ငွေညှစ်နေကြတာတွေလည်း ဆက်တိုက် လုပ်ဆောင်နေကြတယ်လို့လည်း ထုတ်ပြန်ချက်မှာ ပါရှိပါတယ်။
အခုလို ဖြစ်စဥ်တွေကြောင့် ဒီအစွန်းရောက်တပ်ဖွဲ့တွေရဲ့ အန္တရာယ်က ဘင်္ဂလားဒေ့ရှ်-အာရက္ခ နယ်စပ်မှာနေထိုင်တဲ့ ပြည်သူတွေအတွက်လည်း စိုးရိမ်စရာ ဖြစ်လာနေပြီး ဒီအခြေအနေတွေဟာ ဒေသတွင်း ငြိမ်းချမ်းရေး၊ တည်ငြိမ်ရေး၊ ပြည်သူ့လုံခြုံရေးအတွက် စိန်ခေါ်မှုတွေဖြစ်လာနေတယ်လို့လည်း ဆိုပါတယ်။
ဒါကြောင့် အာရက္ခတပ်တော်က မောင်တောနဲ့ ဘူးသီးတောင်မြို့ပတ်ဝန်းကျင်မှာ ARSA, RSO, ARA တပ်ဖွဲ့ဝင်တွေ ခိုအောင်းနိုင်တဲ့နေရာတွေကို ရှင်းလင်းနေပြီး ၂၀၂၄ ခုနှစ် အောက်တိုဘာလ ၁၉ ရက် နေ့လယ် ၁၂ နာရီ ၁၀ မိနစ်မှာ ဘူးသီးတောင်မြို့နယ် ခရုချောင်းကျေးရွာအနောက်မြောက်ဘက် တောင်တန်းတစ်နေရာမှာ တိုက်ပွဲတစ်ခု ဖြစ်ပွားခဲ့တဲ့အပြင် အဲဒီနောက်ပိုင်းမှာလည်း တိုက်ပွဲ ၅ ကြိမ် ထပ်ဖြစ်ပွားပြီး ARSA တပ်ဖွဲ့ဝင်တွေရဲ့ စခန်း ၄ ခု၊ အလောင်းအချို့နဲ့ လက်နက်ခဲယမ်းတွေ သိမ်းဆည်းရမိခဲ့တယ်လို့ ထုတ်ပြန်ထားပါတယ်။
အလားတူ ၂၀၂၄ ခုနှစ်၊ အောက်တိုဘာ ၂၂ ရက်၊ နေ့လယ် ၁၂ နာရီ ၁၀ မိနစ်လောက်မှာလည်း မောင်တောမြို့နယ် ဂြင်းတောစခန်းအရှေ့ဘက် ၃.၇ ကီလိုမီတာအကွာမှာ ARSA တပ်ဖွဲ့ဝင်တွေနဲ့ တိုက်ပွဲဖြစ်ပွားခဲ့ပြီး အာရက္ခတပ်တော်အနေနဲ့ ထွက်ပြေးနေတဲ့ ARSA တပ်ဖွဲ့ဝင်တွေနဲ့ စစ်ကောင်စီက လက်နက်တပ်ဆင်ပေးထားတဲ့ မူဆလင်တပ်ဖွဲ့တွေကို လိုက်လံရှင်းလင်းမှုတွေ လုပ်ဆောင်နေတယ်လို့ ထုတ်ပြန်ထားပါတယ်။
