ကျောက်ဖြူ စနဲဘက်မှာ စကမ တပ်သား ၁၀၀ ကျော်ကျ

by Rakhita Timesမေ 18, 2026မေ 18, 2026161 603

အာရက္ခတိုင်းမ်စ် (၁၈ မေ ၂၀၂၆)

ရက္ခိုင်ပြည် ကျောက်ဖြူမြို့ စနဲဘက်မှာ စစ်ကော်မရှင် တပ်သား ၁၀၀ ကျော် ကျတယ်လို့ ကျောက်ဖြူဒေသခံတဦးက အာရက္ခတိုင်းမ်စ်ကို ပြောပါတယ်။

ရက္ခိုင်ပြည် ကျောက်ဖြူမြို့နယ် တောင်မော်ကြီး ရေတပ်စခန်းဌာနချုပ်ကနေ ရမ်းဗြဲမြို့နယ် စနဲဖက်ကို စစ်ကော်မရှင်က စစ်ကြောင်းထိုးနေလို့ အာရက္ခတပ်တော်နဲ့ တိုက်ပွဲတွေ ပြင်းထန်နေတာပါ။

ဒါပေမယ့် ကျောက်ဖြူမြို့ပေါ်မှာတော့ ဘာမှမဖြစ်ဘူးလို့ ကျောက်ဖြူဒေသခံတဦးက အာရက္ခတိုင်းမ်စ်ကို ပြောပါတယ်။

“နယ်ဘက်တွေမှာတော့ ဟိုနေ့က စနဲ တောင်မော်ကြီးမှာ စစ်သား ၁၀၀ ကျော်လောက် ကျတယ်လို့ ပြောတယ်။ သေတာတော့ သေမှာပေါ့ ဟိုဘက် ဒီဘက် ပစ်နေတော့ ကျမှာပေါ့။ ကျောက်ဖြူမှာ အခြေအနေကတော့ ကျောက်ဖြူမြို့ပေါ်မှာတော့ ဘာမှ မထူးပါဘူး။ နယ်ဘက်ကတော့ ဖြစ်နေကြတာပေါ့။ ကျမတို့ကလည်း ဘယ်လိုဖြစ်နေလဲဆိုတော့ ကျောက်ဖြူရဲ့ အခြေအနေက သတင်း အမှောင်အချထားတဲ့အခါကြတော့ ဘာမှ ကွင်းဆင်းလို့ မရဘူးလေ။ ဖုန်းလိုင်းတွေက ရမှ မရတာ။ သူတို့ဘက်ကလည်း ကျမတို့ဆီကို ဖုန်းဆက်သွယ်လို့ မရဘူး။ ကျမတို့ကလည်း အဲဒီဘက်ကို ဖုန်းဆက်သွယ်လို့ မရဘူး။ ကျောက်ဖြူမြို့ထဲကတော့ ဘာမှ မဖြစ်ဘူး” လို့ သူက ပြောပါတယ်။

စစ်ကော်မရှင်တပ်တွေဟာ တောင်မော်ကြီး ရေတပ်စခန်းဌာနချုပ်ကနေ စနဲနဲ့ မင်းပြင်ဖက်ကို စစ်ကြောင်းထိုးနေလို့ အဝတောင်၊ မြောချောင်းနဲ့ စံပယ်ချောင် စတဲ့နေရာတွေမှာ တိုက်ပွဲတွေ ဖြစ်ပွားနေခဲ့တာလည်း ဖြစ်ပါတယ်။

လက်ရှိမှာတော့ ရက္ခိုင်ပြည် ကျောက်ဖြူမြို့နယ် တောင်မော်ကြီး ရေတပ်စခန်းဌာနချုပ်ဖက်ကို အာရက္ခတပ်တော်က တန်ပြန် ပြန်လည် ထိုးစစ်ဆင်နေတယ်လို့ သိရပါတယ်။

အာရက္ခတပ်တော်နဲ့ စစ်ကော်မရှင်တို့ ဖြစ်ပွားနေတဲ့ တိုက်ပွဲတွေကြောင့် ကျောက်ဖြူမြို့နယ်က သိုင်းချွိန်၊ တောင်မော်၊ မြောချောင်း၊ ထိန်ဒွေ၊ ပြုံးပြဲ၊ အဝတောင် စတဲ့ ကျေးရွာပေါင်း ၁၃ ရွာကျော်က ဒေသခံ ၈၀၀၀ ခန့် အိုးအိမ်စွန့်ခွာပြီး တိုက်ပွဲရှောင်နေကြရတာလည်း ဖြစ်ပါတယ်။

တောင်မော်ကြီး ရေတပ်စခန်းအနီး တိုက်ပွဲက ပြီးခဲ့တဲ့ မေလ ပထမအပတ်မှာ စတင်ခဲ့တာဖြစ်ပြီး စစ်ကော်မရှင်တပ်ဘက်က အကျအဆုံး များခဲ့တာကြောင့် လေကြောင်းကနေ ပစ်ကူတဲ့အပြင် စစ်အင်အားနဲ့ လူအင်အားပါ ဆက်တိုက်ဖြည့်တင်းနေတာဖြစ်ပြီး လက်ရှိအချိန်ထိ တိုက်ပွဲ ပြင်းထန်နေတာ ဖြစ်ပါတယ်။