စစ်တွေမှာ ကလေးနဲ့ လူကြီး တောင်းရမ်းသူ ပိုမိုများပြားလာ

အာရက္ခတိုင်းမ်စ် (၃ မေ ၂၀၂၆)

ရက္ခိုင်ပြည် စစ်တွေမြို့နယ်က နေရာအများအပြားမှာ ကလေး၊ လူကြီး တောင်းရမ်းသူတွေ အရင်ကထက် ပိုမိုများပြားလာနေသလို ပိုမိုဆိုးရွားလာနေကြတယ်လို့ စစ်တွေဒေသခံတဦးက အာရက္ခတိုင်းမ်စ်ကို ပြောပါတယ်။

“အခုက စစ်တွေမြို့မှာပါလေ နေရာတကာမှာ လက်ဖြန့်တောင်းစားတဲ့သူတွေ အရမ်းများလာပါတယ်။ ဗမာပြည်ကလို။ အရင်ကဆို ရန်ကုန်တွေမှာ တောင်းစားတဲ့သူတွေ များတယ်လို့ မြင်တယ်။ အခု ကိုယ်တို့ စစ်တွေမြို့မှာ တော်တော်ကြီး လက်ဖြန့်တောင်းစားတဲ့သူတွေ တော်တော် များလာပါတယ်။ တခါတလေ အရင်အခါက မရှိခဲ့တဲ့နေရာတွေ ကမ်းနားလမ်းတွေမှာ စိတ်အပန်းဖြေဖို့ သွားတယ်၊ ထိုင်ဖို့ မပြင်ပါသိ အကြီးတွေလည်းမဟုတ် ကလေးတွေ တခါလာရင် ၂ ယောက် ၃ ယောက် တတိုင်တည်းလည်းမဟုတ်။ ထိုင်တာနဲ့ အသုတ်သုတ် လာခဲ့ပါပြီ” လို့ သူက ပြောပါတယ်။

အဲဒီ တောင်းရမ်းသူတွေမှာ ကလေးသူငယ်က ပိုမိုများပြားကြောင်းနဲ့ လူကြီးတွေလည်း အထိုက်အလျောက် တောင်းရမ်းကြသူတွေ ရှိကြောင်းလည်း သိရပါတယ်။

အဲဒီလို တောင်းရမ်းကြတဲ့ ကလေးတွေဟာ လူတွေနဲ့ မကပ်ပဲ တောင်းရမ်းကြတာမျိုးမဟုတ်ဘဲ အဝတ်စတွေကို ဆွဲပြီး တောင်းရမ်းကြသလို အတင်းကပ်ပြီး တောင်းရမ်းကြတာမျိုးတွေ ဖြစ်တယ်လို့ စစ်တွေဒေသခံတဦးက အာရက္ခတိုင်းမ်စ်ကို ပြောပါတယ်။

“အေးလို့ ချမ်းလို့ သွားထိုင်တာလည်း ရှိတယ်၊ ပျော်လို့ သွားထိုင်တာလည်း ရှိပါမလား။ တောင်းတိုင်းကိုလည်း လာသမျှ တောင်းတိုင်းကိုလည်း ဘယ်လိုပေးနိုင်မလဲ ကိုယ်တွေလည်း အဆင်ပြေနေတာမှ မဟုတ်တာ။ လာတယ်ဆိုရင် မပေးနိုင်၊ နင်တို့မှာ လက်အကောင်း၊ ခြေအကောင်း မဟုတ်ဘူးလား လုပ်စားကြပါလား အဲဒီလိုပုံစံနဲ့ ပြောကြပါတယ်။ ကိုယ်တိုင်လည်း ကြုံခဲ့တယ်။ ပြီးရင် ကမ်းနားလမ်းမှာ မဟုတ်ဘူး။ ဆေးဝယ်နေတဲ့အခါ နောက်ကနေ လိုက်ပြီး ကလေးတွေ အင်္ကျီကို ဆွဲထားတယ် ပြီးရင် လက်ဖြန့်လို့ အလှူခံတယ်။ နေရာအနှံ့မှာ ဖြစ်လာတယ်။ နောက်ပြီးရင် ရွှေငါးမုန့်ဆိုင်တွေ၊ စတိုးဆိုင်တွေ ရှိတဲ့ အဝတွေမှာဆိုရင် အဝတ်တွေခင်းပြီး တောင်းကြတယ်။ ဝင်သွားတဲ့အခါ မတောင်းဘူး။ ထွက်လာတဲ့အခါမှာ အဓမ္မဆွဲလို့ လိုက်တောင်းခဲ့ကြတယ်” လို့ သူက ပြောပါတယ်။

မုန့်တီဆိုင်အနား ပတ်ဝန်းကျင်တွေမှာလည်း အဲဒီ တောင်းရမ်းသူတွေ ရှိနေတတ်ကြပြီး မုန့်စားနေချိန်မှာလည်း အတင်းလာရောက် တောင်းရမ်းကြတဲ့အခြေအနေမျိုးတွေ ဖြစ်နေတယ်လို့ သိရပါတယ်။

Photo – ChatGPT