အာရက္ခတိုင်းမ်စ် (၈ မေ ၂၀၂၆)
ရက္ခိုင်ပြည် မင်းပြားနဲ့ ကျောက်တော်မြို့နယ်ကို စစ်ကော်မရှင်က မေလ ၇ ရက်က ဗုံးကြဲတိုက်ခိုက်ခဲ့လို့ ပြည်သူ ၁ ဦး၊ အကျဉ်းထောင်ဆေးဝန်ထမ်း ၁ ဦး၊ ကလေး ၁ ဦး သေဆုံးခဲ့ပြီး ၁၀ ဦး ဒဏ်ရာရရှိခဲ့တယ်လို့ သိရပါတယ်။
စစ်ကော်မရှင်ဟာ မင်းပြားနဲ့ ကျောက်တော်မြို့နယ်အတွင်းရှိ ကျေးရွာတချို့နဲ့ အကျဉ်းထောင်တချို့ကို လေကြောင်းကနေ ဗုံးကြဲတိုက်ခိုက်မှု နှစ်ကြိမ်တိုင်တိုင် တရက်တည်း ပြုလုပ်ခဲ့တာလည်း ဖြစ်ပါတယ်။
ရက္ခိုင်ပြည် မင်းပြားမြို့နယ် ကျောက်ခုတ်ကျေးရွာ အရှေ့တောင်ဖက်ရှိ ကင်းမွန်ချောင်းဂျိုင်နဲ့ အနီးပတ်ဝန်းကျင်ရှိ ကျေးရွာများကို မေလ ၇ ရက် နေ့လည် ၂ နာရီ ၁၅ မိနစ်အချိန်ခန့်တွင် စစ်ကော်မရှင်က ဂျက်ဖိုက်တာ ၂ စီး၊ Y-12 ၁ စီးနဲ့ အဆိုပါနေရာများကို မိနစ် ၄၀ ခန့် တရစပ် မရပ်မနား ဗုံးကြဲတိုက်ခိုက်ခဲ့မှုကြောင့် အရပ်သား ပြည်သူတချို့ သေဆုံး၊ ဒဏ်ရာရမှုများ ရှိခဲ့ပြီး လူနေအဆောက်အအုံတချို့ ပျက်စီးပြီး ကျွဲ၊ နွား စတဲ့ တိရစ္ဆာန် တချို့ သေဆုံး ဒဏ်ရာ ရရှိခဲ့တယ်လို့ အာရက္ခတပ်တော်က ထုတ်ပြန်ပါတယ်။
အလားတူ စစ်ကော်မရှင်က ကျောက်တော်မြို့နယ် သုံးခွအနီးပတ်ဝန်းကျင်ကိုလည်း ဂျက်ဖိုက်တာ ၄ စီးနဲ့ ည ၁၀ နာရီကနေ ၁၀ နာရီ ၂၅ မိနစ်အထိ ပေါင် ၅၀၀ ဗုံး ၈ လုံးနဲ့ လာရောက် ပစ်ခတ်တိုက်ခိုက်ခဲ့ပြီး ၁၀ နာရီ ၂၈ မိနစ်တွင်လည်း Y-12 ထောက်ပို့လေယာဉ် ၂ စီးကနေ Cluster Boombအမျိုးအစား ၂၄ လုံးခန့် လာရောက် ဗုံးကြဲတိုက်ခိုက်ခဲ့တယ်လို့လည်း အာရက္ခတပ်တော်က ဆိုပါတယ်။
အဆိုပါ ဗုံးကြဲတိုက်ခိုက်မှုကြောင့် အရပ်သားပြည်သူ ၁ ဦး၊ အကျဉ်းထောင်ဆေးဝန်ထမ်း ၁ ဦး၊ ကလေး ၁ ဦး သေဆုံးခဲ့ပြီး ပြင်းထန်နဲ့ အလတ်စား ဒဏ်ရာရသူ ၁၀ ဦးခန့် ရှိခဲ့တယ်လို့ သိရပါတယ်။
ထိုအပြင် ကျောက်တော်မြိုနယ်၊ ပြိုင်းချောင်းကျေးရွာမှ အရပ်သား တစ်ဦး ပိုင်ဆိုင်သော နွား (၇) ကောင်လည်း ဤဗုံးကြဲတိုက်ခိုက်မှုကြောင့် သေဆုံးခဲ့သည်။
